Qazaqstannyń «QazMunaiGaz» ulttyq munai kompaniiasy Atyraý oblysyndaǵy burynǵy iadrolyq poligon aýmaǵynda ornalasqan «Taisoiǵan» ýchaskesinde alǵashqy barlaý uńǵymasyn burǵylaýdy bastady, dep habarlaidy Dalanews.kz telegram arnadaǵy derekkózge silteme jasap.
Ǵalymdardyń boljamy boiynsha, munai ken orny 749 myń gektar aýmaqty qamtityn burynǵy Taisoiǵan poligonynda ornalasqan, ol Atyraýdan 250 km qashyqtyqta jatyr. Kompaniia 5600 sharshy km aýmaqty qamtityn 3D seismikalyq barlaý derekteri negizinde tereńdigi 400-3800 metr bolatyn segiz uńǵyma burǵylaýdy josparlap otyr.
Buǵan deiin osy óńirdiń fermerleri Májilis depýtattaryna Taisoiǵandy erekshe qorǵalatyn tabiǵi aimaq retinde tanyp, geologiialyq barlaý jumystaryna tyiym salýdy usynǵan edi.
Olardyń pikirinshe, bul aimaqtaǵy jerasty sý qory men jaiylymdyq jerler erekshe qundy, óitkeni negizinen aýyl sharýashylyǵyna jaramsyz bolyp tabylatyn Atyraý oblysy úshin mańyzy zor.
Úndeý avtorlary munai óndirý bastalǵan jaǵdaida jerasty sý deńgeiiniń tómendep, jerdiń shóleittený qaýpi bar ekenin alǵa tartty.
Alaida ótken jyly ekologiia salasyndaǵy ýákiletti organ burǵylaý jumystary jerasty sýlaryna teris áser etpeidi degen qorytyndy jasap, ruqsat bergen bolatyn.
Resmi derekterge sáikes, 1966 jyldan 1977 jylǵa deiin bul poligonda 500 metr tereńdikte 24 jer asty iadrolyq jarylys júrgizilgen. Munda alǵashqy barlaý jumystary 1999 jyly bastalǵan, nátijesinde Ýaz jáne Kondybai ken oryndary anyqtalǵan.
