Jańa Konstitýtsiiada engizilgen vitse-prezident institýtyna qatysty negizgi talaptar belgili boldy. Konstitýtsiiaǵa sáikes, Prezident alǵashqy sailanǵan Quryltaidyń birinshi sessiiasy ashylǵan kúnnen bastap eki ai ishinde Quryltaidyń kelisimimen vitse-prezidentti taǵaiyndaýǵa mindetti, dep habarlaidy dalanews.kz.
Debate Orda telegram arnasynyń málimetinshe, bul másele keiinge qaldyrylmaidy.
"Eger Quryltai óz jumysyn qyrkúiekte bastasa, qazan aiynyń aiaǵyna deiin Qazaqstanda vitse-prezident bolady", – delingen jazbada.
Jańa Konstitýtsiiaǵa sáikes, vitse-prezident laýazymyna Qazaqstan Respýblikasynyń azamaty, 40 jasqa tolǵan, memlekettik tildi erkin meńgergen, keiingi 15 jyl boiy Qazaqstanda turaqty turǵan jáne joǵary bilimi bar azamat taǵaiyndala alady.
Sonymen qatar derekkóz avtorlarynyń atap ótýinshe, Prezidenttikke úmitkerge qoiylatyn talaptarmen salystyrǵanda bir erekshelik bar.
"Prezidenttikke kandidatqa qoiylatyn talaptardan ereksheligi - Vitse-prezidentke memlekettik qyzmet ótili mindetti talap retinde belgilenbegen", - dep jazylǵan.
Qujatqa sáikes, vitse-prezident depýtat bola almaidy, basqa aqy tólenetin qyzmet atqarmaidy, kásipkerlikpen ainalyspaidy jáne saiasi partiia múshesi bola almaidy. Bul talaptar onyń saiasi beitaraptyǵy men memlekettik qyzmettiń táýelsizdigin qamtamasyz etýge baǵyttalǵan.
Sondai-aq jańa Konstitýtsiiaǵa sáikes, Prezidenttiń ókilettigi merziminen buryn toqtatylǵan jaǵdaida memleket basshysynyń ókilettigi eń aldymen vitse-prezidentke ótedi.
"Sondyqtan bul laýazym formaldy emes, eldegi konstitýtsiialyq turaqtylyq pen bilik sabaqtastyǵyn qamtamasyz etetin negizgi memlekettik institýttardyń birine ainalady", – dep túiindeidi derekkóz.
