Qazaqstanda ustalǵan qyrǵyzstandyq mýzykant Vikram Rýzahýnov 10 qańtarda bosatylyp, Bishkekke keldi. Bul týraly Azattyqtyń Qyrǵyz qyzmetine tanystarynyń biri habarlady.
9 qańtarda "Qazaqstan" jáne "Habar 24" arnalary "Qazaqstandaǵy mitingige qatysqany úshin aqsha aldy" dep bir qyrǵyzstandyqty kórsetken edi. Al Qyrǵyzstan turǵyndary Qazaqstan arnalary kórsetken adam belgili djaz mýzykanty ári pianist Vikram Rýzahýnov ekenin jappai aita bastady.
Videodaǵy adam jumyssyz ekenin, 1 qańtarda belgisiz adamdar mitingige qatysý úshin 90 myń teńge usynǵanyn, bilet ápergenin, páterge ornalastyrǵanyn aitady. Sóilep turǵan adamnyń betinde soqqy izderi bar, bir kózi isip ketken.
Artynsha qyrǵyzstandyqtar bul adamnyń belgili mýzykant Vikram Rýzahýnov ekenin rastap, keibiri oǵan bul sózderdi azaptap aittyrdy dedi.
Jaqyndary birneshe kúnnen beri Rýzahýnovty tappai júrgen. Qyrǵyzstan ishki ister ministrligi Rýzahýnovtyń Almatyǵa biletti jeltoqsanda satyp alǵanyn, 2 qańtarda Qazaqstanǵa kontsert qoiýǵa ketkenin málimdedi.
9 qańtarda bir top qyrǵyzstandyq Qazaqstannyń Bishkektegi elshiligi aldyna narazylyq aktsiiasyn ótkizip, Rýzahýnovty bosatýdy talap etti. Aktsiiaǵa Qyrǵyzstan UQK tóraǵasy Qamshybek Tashiev te keldi.
Jiynda Tashiev "Memlekettik organdar tarapynan resmi túrde Rýzahýnovtyń "terrorist emespin" resmi túrde málimdeimiz. Qazaqstannyń memarnalarynda taratylǵan aqparat qate. Tergeýdiń ritorikasyn ózgertý kerek. Bizdiń azamatty terrorizmge aiyptaý durys emes" degen.
Qyrǵyzstan osy oqiǵaǵa bailanysty Qazaqstanǵa qarsylyq notasyn joldaǵan.
Qazaqstanda bilikke qarsy jappai narazylyq sońǵy tártipsizdikke ulasqan soń bilik eldegi jaǵdaiǵa "shetelde daiyndalǵan terroristerdi" aiyptai bastaǵan. Biraq bilik "terroristerdiń" kim ekenin naqty aitpai otyr.
