Qazaqstanda USAID qyzmetine aýdit júrgiziledi, dep habarlaidy Dalanews.kz.
Vitse-premer Serik Jumanǵarinniń málimdeýinshe, 2024 jyly Qazaqstannyń Syrtqy ister ministrliginde USAID qyzmetin jan-jaqty zertteý maqsatynda arnaiy jumys toby qurylǵan. Bul top agenttik qarjylandyratyn jobalardy, olardyń maqsattary men naqty nátijelerge sáikestigin taldaidy.
«Atap aitqanda, USAID-tyń eldik strategiialary zertteledi, sondai-aq onyń basqa uiymdarmen, sonyń ishinde memlekettik jáne úkimettik emes qurylymdarmen bailanystary qarastyrylady. Bul bailanystardyń USAID maqsattaryna yqtimal áserin baǵalaý mańyzdy. Sonymen qatar, qarjylyq aǵyndardy saraptaý qajet, iaǵni qarjynyń jumsalýyn, yqtimal jasyryn shemalardy, qarajattyń durys paidalanylmaýyn jáne múddeler qaqtyǵysyn anyqtaý kerek», – dedi vitse-premer.
AQSh Memlekettik departamentiniń Qazaqstannyń Syrtqy ister ministrligine bergen málimetine sáikes, 2024 jyly ekijaqty kelisimder aiasynda USAID qatysýymen 28 uzaq merzimdi baǵdarlama júzege asyrylyp jatyr. 2023–2024 jyldary agenttik ekonomika, energetika, densaýlyq saqtaý, azamattyq qoǵam jáne media salalaryndaǵy jobalarǵa 26,5 million dollar bólgen. Keibir baǵdarlamalar tek Qazaqstandy ǵana emes, Ortalyq Aziianyń basqa elderin de qamtidy (jobalar tizimi joǵaryda kórsetilgen).
USAID qarjylai qoldaý kórsetken uiymdar qatarynda tek úkimettik emes uiymdar ǵana emes, memlekettik organdar da bar. Mysaly, agenttik Qazaqstannyń Memlekettik kirister komitetine (MKK) 385,8 million teńge turatyn serverlik jabdyqty tapsyrǵan.
