قازاقستاندا USAID قىزمەتىنە اۋديت جۇرگىزىلەدى، دەپ حابارلايدى Dalanews.kz.

ۆيسە-پرەمەر سەرىك ءجۇمانعاريننىڭ مالىمدەۋىنشە، 2024 جىلى قازاقستاننىڭ سىرتقى ىستەر مينيسترلىگىندە USAID قىزمەتىن جان-جاقتى زەرتتەۋ ماقساتىندا ارنايى جۇمىس توبى قۇرىلعان. بۇل توپ اگەنتتىك قارجىلاندىراتىن جوبالاردى، ولاردىڭ ماقساتتارى مەن ناقتى ناتيجەلەرگە سايكەستىگىن تالدايدى.

«اتاپ ايتقاندا، USAID-تىڭ ەلدىك ستراتەگيالارى زەرتتەلەدى، سونداي-اق ونىڭ باسقا ۇيىمدارمەن، سونىڭ ىشىندە مەملەكەتتىك جانە ۇكىمەتتىك ەمەس قۇرىلىمدارمەن بايلانىستارى قاراستىرىلادى. بۇل بايلانىستاردىڭ USAID ماقساتتارىنا ىقتيمال اسەرىن باعالاۋ ماڭىزدى. سونىمەن قاتار، قارجىلىق اعىنداردى ساراپتاۋ قاجەت، ياعني قارجىنىڭ جۇمسالۋىن، ىقتيمال جاسىرىن سحەمالاردى، قاراجاتتىڭ دۇرىس پايدالانىلماۋىن جانە مۇددەلەر قاقتىعىسىن انىقتاۋ كەرەك»، – دەدى ۆيسە-پرەمەر.

اقش مەملەكەتتىك دەپارتامەنتىنىڭ قازاقستاننىڭ سىرتقى ىستەر مينيسترلىگىنە بەرگەن مالىمەتىنە سايكەس، 2024 جىلى ەكىجاقتى كەلىسىمدەر اياسىندا USAID قاتىسۋىمەن 28 ۇزاق مەرزىمدى باعدارلاما جۇزەگە اسىرىلىپ جاتىر. 2023–2024 جىلدارى اگەنتتىك ەكونوميكا، ەنەرگەتيكا، دەنساۋلىق ساقتاۋ، ازاماتتىق قوعام جانە مەديا سالالارىنداعى جوبالارعا 26،5 ميلليون دوللار بولگەن. كەيبىر باعدارلامالار تەك قازاقستاندى عانا ەمەس، ورتالىق ازيانىڭ باسقا ەلدەرىن دە قامتيدى (جوبالار ءتىزىمى جوعارىدا كورسەتىلگەن).

USAID قارجىلاي قولداۋ كورسەتكەن ۇيىمدار قاتارىندا تەك ۇكىمەتتىك ەمەس ۇيىمدار عانا ەمەس، مەملەكەتتىك ورگاندار دا بار. مىسالى، اگەنتتىك قازاقستاننىڭ مەملەكەتتىك كىرىستەر كوميتەتىنە (مكك) 385،8 ميلليون تەڭگە تۇراتىن سەرۆەرلىك جابدىقتى تاپسىرعان.