Ánshi Dilnaz Ahmadieva «Zamandas» podkastynda Qazaqstandaǵy qazaq tiliniń orny týraly ashyq pikir aitty. Ol, ásirese, qyzmet kórsetý salasynda isteitin mamandar memlekettik tilde sóileýdi mindet dep sanaitynyn jetkizdi, dep habarlaidy Dalanews.kz Ulysmedia.kz-ke silteme berip.
Dilnazdyń aitýynsha, halyqpen tikelei jumys isteitin oryndarda qazaqsha qyzmet kórsetý qalypty talapqa ainalýy kerek. Ánshi til bilmeý saldarynan týyndaityn daýly jaǵdailar azaiyp kele jatqanyn da atap ótti. Ol jýyrda qazaqsha jaýap berýden bas tartqan qyzmetkerdiń jumystan shyǵarylǵany týraly mysaldy keltirip, bul máselege qoǵamnyń talaby kúsheigenin meńzedi.
– Qyzmet kórsetý mindetti túrde qazaq tilinde bolýy kerek. Tek qazaq tilinde bolýy tiis. Bul – qalypty qubylys. Sondyqtan, menińshe, qazir adamdar sóilei almasa, osyndai jaǵdailardyń bári toqtatylyp jatyr. Jaqynda bir qyzdy áldebir meiramhanadan jumystan shyǵarypty, ol qazaqsha birdeńe dep jaýap bergisi kelmegen, onda ormanǵa barsyn. Sen Qazaqstanda turasyń, ásirese qyzmet kórsetýshi personalda, bankte nemese taǵy bir jerde jumys isteseń, qazaq tilin bilýge mindettisiń, – dedi Ahmadieva.
Dilnaz Ahmadieva – qazaqstandyq estradada óz orny bar ánshi, aktrisa ári telejúrgizýshi, Qazaqstannyń eńbek sińirgen qairatkeri. Ol Almatyda ónerli ortada ósip-jetilgen: anasy – balerina, ákesi – akter ári ánshi. Sahnaǵa erte aralasqan ónerpaz kópshilikke 2000-jyldardyń basynda shyqqan albomynan keiin keńinen tanyla bastady. Ánshi shetel sahnalarynda da óner kórsetip, kino jobalarǵa qatysyp, búginge deiin el estradasyndaǵy tanymal esimderdiń qatarynda.
