Qazaqstanda sońǵy jeti jylda tegin dári-dármekpen qamtamasyz etiletin azamattar sany kúrt artty, dep habarlaidy dalanews.kz.
Densaýlyq saqtaý ministrligi qazir eldegi árbir altynshy turǵyn memleket esebinen dári alatynyn málimdedi. Bul týraly Ortalyq kommýnikatsiialar qyzmetinde ótken brifingte Densaýlyq saqtaý vitse-ministri Timýr Muratov aitty. Onyń sózinshe, ambýlatoriialyq dári-dármekpen qamtamasyz etý júiesi sońǵy jyldary aitarlyqtai keńeigen.
«2018 jyly 1,9 mln adam tegin dári-dármekpen qamtamasyz etilse, 2025 jylǵa qarai bul kórsetkish 3,4 mln azamatqa jetti. Eldiń árbir altynshy turǵyny memleketten dári-dármek túrinde qoldaý alady. Ambýlatoriialyq dári-dármekpen qamtamasyz etý biýdjeti úsh eseden astam ósti. 2018 jylǵy 87,2 mlrd teńgeden 2026 jylǵa qarai josparlanǵan 337 mlrd teńge kórsetkishine shyǵamyz. Bul ósim tek infliatsiialyq protsesterge ǵana emes, sonymen qatar qymbat turatyn innovatsiialyq dárilerdiń tizimge engizilýine de bailanysty», – dedi Timýr Muratov.
Sonymen qatar Densaýlyq saqtaý ministrligi eldegi otandyq farmatsevika úlesin arttyrý jumystary kúsheitilgenin málimdedi.
Qazir Qazaqstanda 31 otandyq óndirýshimen 83 uzaq merzimdi kelisimshart jumys istep tur.
«Úsh jyl ishinde satyp alý kólemi 38,1%-ǵa ósti, 2024 jylǵy 703 ataýdan 2026 jyly 971 ataýǵa deiin jetti. 2025 jyly otandyq Biryńǵai distribiýtor arqyly satyp alýdyń jalpy satyp alý kólemindegi aqshalai úlesi 32% qurasa, 2027 jylǵa qarai bul kórsetkishti 34%-ǵa deiin arttyrý kózdelgen», – dedi vitse-ministr.
Onyń aitýynsha, otandyq kompaniialardyń ónimderin lokalizatsiialaý úshin jalpy somasy shamamen 360 mlrd teńgege 7 investitsiialyq kelisim jasalǵan.
Brifing barysynda dári-dármek qory men logistika máselesi de kóterildi.
Ministrlik málimetinshe, halyqty dárimen úzdiksiz qamtamasyz etý úshin azaimaityn qor jasaqtalǵan.
«2025 jyly tómendetilmeitin qor somasy 21 mlrd teńgeni qurady jáne 655 dári ataýyn qamtidy. 2025 jyl ishinde, tamyz jáne qarasha ailarynda onkologiia, qant diabeti, onkogematologiia, aǵzalardy transplantatsiialaýdan keiingi jaǵdailar jáne t.b. nozologiialardy emdeý úshin tiisinshe 8,5 mlrd jáne 4,4 mlrd teńge somasyna dári qosymsha satyp alyndy», – dedi Timýr Muratov.
Sondai-aq ministrlik dári saqtaý infraqurylymyn keńeitýdi josparlap otyr. Aqtóbe, Astana, Almaty, Shymkent, Aqtaý jáne Semei qalalarynda jańa qoimalar salynbaq.
Vitse-ministr dári-dármek satyp alý júiesinde sońǵy jyldary baqylaý men ashyqtyq kúsheitilgenin atap ótti.
«Dárilik zattardy satyp alý kezinde logistikalyq-fýnktsionaldyq baqylaýdyń 40 parametri engizildi, onyń 15-i 2024-2026 jyldar aralyǵynda engizilip, protsesterdiń ashyqtyǵyn arttyrýǵa yqpal etti», – dedi ol.
Aita keteiik, buǵan deiin Úkimette ótken keńeste premer-ministr Oljas Bektenov te otandyq farmatsevtikalyq óndiristi kúsheitý máselesin kótergen edi. Úkimet deregine sáikes, búginde elde 209 otandyq óndirýshi tirkelgen. Onyń 43-i dári-dármek shyǵarsa, 166-sy meditsinalyq buiym óndiredi.
