Qazaqstan TRASECA úkimetaralyq komissiiasyna tóraǵalyqty qabyldady. Bul — Eýropa, Kavkaz jáne Aziiany bailanystyratyn halyqaralyq kólik dálizin damytýǵa baǵyttalǵan uiym, dep habarlaidy dalanews.kz.
Qazaqstannyń Kólik ministrligi málimetinshe, Astanada XVIII TRASESA úkimetaralyq komissiiasynyń jyl saiynǵy otyrysy ótip jatyr. Jiynǵa uiymǵa múshe elderdiń delegatsiialary, turaqty hatshylyq ókilderi, baqylaýshy memleketter men halyqaralyq seriktester qatysýda.
Kezdesý barysynda halyqaralyq kólik dálizderin damytý, aimaqtyń tranzittik áleýetin kúsheitý, júk tasymalyn tsifrlandyrý jáne elder arasyndaǵy yntymaqtastyqty keńeitý máseleleri talqylanǵan.
Is-sharada sóz sóilegen Qazaqstannyń kólik ministri Nurlan Saýranbaev halyqaralyq kólik bailanystaryn damytý, infraqurylymdy jańǵyrtý jáne tasymal tiimdiligin arttyrý Qazaqstan úshin basym baǵyttardyń biri ekenin aitty.
“Qazaqstan TRASEKA keńistiginde qaýipsiz, turaqty ári básekege qabiletti kólik baǵyttaryn damytýǵa aldaǵy ýaqytta da belsendi qoldaý kórsetedi”, — dedi ministr.
Kún tártibinde tranzittik yntymaqtastyqty kúsheitý, halyqaralyq logistikalyq tizbekterdi jetildirý, birqatar qujatqa qol qoiý jáne uiymnyń bas hatshysyn sailaý máseleleri de qaralǵan.
Ministrlik málimetinshe, TRASEKA — Eýropa men Aziia arasyn bailanystyratyn mańyzdy halyqaralyq kólik dálizderiniń biri. Uiymǵa Qazaqstannan bólek Ázerbaijan, Armeniia, Grýziia, Túrkiia, Iran, Ózbekstan, Qyrǵyzstan, Tájikstan, Ýkraina jáne basqa da elder múshe.
Otyrys barysynda Iran resmi túrde uiymdaǵy tóraǵalyqty Qazaqstanǵa tapsyrdy. Vedomstvonyń pikirinshe, bul Qazaqstannyń tranzittik múmkindigin keńeitip, Eýropa men Aziia arasyndaǵy kólik bailanysyn nyǵaitýǵa qosymsha serpin beredi.
TRASEKA baǵdarlamasy 1993 jyly Eýroodaq bastamasymen qurylǵan. Joba Qara teńiz, Kavkaz jáne Kaspii teńizi arqyly ótetin temirjol, avtokólik, teńiz jáne áýe baǵyttaryn damytýǵa arnalǵan. Sarapshylar bul dálizdi dástúrli Transsibir baǵytyna balama halyqaralyq marshrýttardyń biri retinde baǵalaidy.
