Jýrnalist Asylhan Mamashuly qalyń kópshilikke 1986 jylǵy Jeltoqsan oqiǵasyna arnalǵan «Qily kezeń» jobasynyń ekinshi bólimin usyndy. Ol bul shyǵarylymda jeltoqsanshylardy aiyptaǵan mádeniet ókilderin jipke tizdi. Kóteriliske shyqqan qazaq jastaryn maskúnem men nashaqorǵa teńegender qatarynda tanymal akter Asanáli Áshimov, ánshi Ermek Serkebaev, aqyndar Ǵafý Qaiyrbekov pen Qalijan Bekhojin bar, dep habarlaidy dalanews.kz.
1986 jyly jeltoqsan aiynyń 21-i kúni Vecherniaia Alma-Ata gazetine «Bizge óte aýyr» («Nam gorko») deitin úndeý jariialandy. Úndeýde:
«Ultshyl piǵyldaǵy elementterdiń aidap salýymen esirtki men ishimdikke elitken jastar qoǵamdyq tártipti óreskel buzyp, órt qoiyp, qiratýmen ainalysty. Esh kinásiz adamdardy uryp-soqty» dep jazylǵan.
Sonymen qatar, jeltoqsanshy jastardyń artynan neshe túrli shym-shytyryq jalǵan oqiǵalar taraǵan. «1-Almatyda orys balabaqshalaryndaǵy balalardy órtep, qyryp ketipti» degen jalǵan aqparattar jeldei esken. Tipti bul jaǵa ustatar aqparattar kóshede aiqailap aitylyp, eldi shoshytqan.
Endi gazet betindegi úndeýge qaita oralaiyq. Hatqa qol qoiǵandar: Akter Asanáli Áshimov, ánshi Ermek Serkebaev, aqyndar — Ǵafý Qaiyrbekov pen Qalijan Bekhojin, akademik Murat Aithojin jáne G.Dihanbaeva men M.Ahmetova degen eki jumysshy. Hat ieleri qazaq jastarynyń kóteriliske shyqqan áreketine uialyp otyrǵandaryn da jazǵan.
Aita keteiik, Dos Kóshimniń sózinshe, aqyn Qadyr Myrza Áli qol qoiýdan birden bas tartypty.
Jeltoqsan oqiǵasyna qatysqan saiasatker Dos Kóshim sol kezderi bul úndeýdi jasaǵandarǵa ashýlanǵanyn jasyrmady. Bul úndeý 3 gazetke jariialanypty.
Asylhan Mamashulynyń aitýynsha, birneshe jyldardan keiin úndeý avtorlarynyń biri — Ǵafý Qaiyrbekov ol hatty óziniń syrtynan jazyp jibergenin, ózi qol qoimaǵanyn aityp aqtalǵan. Belgili akter Asanáli Áshimov te solai aityp basyn ala qashypty. Akter Dos Kóshimge habarlasyp, úndeý jariialanǵan ýaqytta basqa qalada bolǵanyn aitqan. Sonymen qatar, «osy taqyrypta gazet-jýrnaldarda meniń atymdy jaza beresiń» dep renjigen.
«Qandaida bir oqiǵa ne bastama paida bola qalsa, ziialy qaýymnyń atynan úndeý jariialaý Keńes Úkimetiniń dástúrli saiasaty bolatyn», — dedi Asylhan Mamashuly.
