Qasym-Jomart Toqaev Ózbekstan prezidenti Shavkat Mirziioevpen birge Túrkistandaǵy jańa meshitti aralap kórdi, dep habarlaidy dalanews.kz.
Qasym-Jomart Toqaev pen Shavkat Mirziioev Qazaqstan men Ózbekstan arasyndaǵy baýyrlastyq bailanys jáne rýhani yntymaqtastyq nyshany retinde Túrkistanda boi kótergen meshitpen tanysty.
Qulshylyq úiiniń ortalyq zalynda Quran oqyldy. Meshit Ózbekstan prezidentiniń Túrkistan turǵyndary men barsha qazaqstandyqtarǵa tartýy retinde salynǵan.
Ǵimaratta dástúrli islam elementteri zamanaýi qurylys tehnologiialarymen úilesim tapqan. Qasbeti men ishki aýmaǵy ulttyq oiý-órnekpen jáne musylman kalligrafiiasymen bezendirilgen. Munaralardyń biiktigi – 61 metr.
Ǵibadat orny jańa injenerlik jelilermen jabdyqtalǵan. Sondai-aq, abattandyrylǵan aýmaqta jaryqtandyrý júieleri, demalys aimaqtary, sýburqaqtar bar.
