Astana ákimdigi jeńil relsti kólik júiesiniń (LRT) naqty iske qosylatyn kúnin jariialady, dep habarlaidy dalanews.kz.
Buǵan deiin City Transportation Systems basqarma tóraǵasy Asylbek Dúisebaev LRT aldaǵy demalys kúnderi – 16-17 mamyrda iske qosylatynyn aitqan edi. Al ákimdik málimetinshe, júieniń resmi iske qosylatyn kúni – 17 mamyr, jeksenbi.
Jol júrý quny qolma-qol jáne qolma-qolsyz tólem kezinde 200 teńge bolady. Sonymen qatar 7-18 jas aralyǵyndaǵy oqýshylar men Astanada tirkelip, turaqty turatyn jeńildik sanatyndaǵy jolaýshylarǵa tegin jol júrý qarastyrylǵan.
LRT baǵyty elordadaǵy negizgi kósheler men mańyzdy nysandardy qamtidy. Atap aitqanda, poiyzdar áýejai, Qabanbai batyr dańǵyly, «Astana juldyzy» stelasy, Mega Silk Way, Botanikalyq baq, Abu Dhabi Plaza, Ministrlikter úii, Arys kópiri, Qaldaiaqov kóshesi, Ulttyq mýzei jáne «Nurly jol» vokzaly arqyly qatynaidy.
Quramdar kún saiyn tańǵy saǵat 06:00-den 23:00-ge deiin júredi.
Ákimdik málimetinshe, jelide 15 poiyz qatynaidy, onyń tórteýi rezervte bolady. Poiyzdardyń jyldamdyǵy saǵatyna 60 shaqyrymǵa deiin jetedi. Tórt sektsiiadan turatyn bir quram tolyq júktememen 600-den astam jolaýshyny tasymaldai alady.
