Azamattyq belsendi Jarqyn Kúrentaev oligarhtar Qazaqstanǵa qarsy shyqqanyn, elden tanker arqyly dizel urlanbaq bolǵanyn aitty, - dep habarlaidy Dalanews.kz.
«Oligarhtar Qazaqstanǵa qarsy. Aqtaýdaǵy saýda teńiz kemejaiynda Meliana tankeriniń («BatysNefteTreid» JShS-ne tiesili) turǵanyna bir jyl boldy. Tankerde munai ónimderi bar. Shekara qyzmetkerleriniń oiynsha, qujat boiynsha pesh otyn degen syńaimen dizel otynyn Ázerbaijanǵa, naqty aitqanda eldegi SOCAR memlekettik kompaniiasyna eksporttalmaq bolǵan. Kontrabanda kezinde Meliana tankeri ashyq teńizde ketip bara jatqan kezinde basyp alyndy. Bul is boiynsha qylmystyq ispen Mańǵystaý oblysy boiynsha Ulttyq qaýipsizdik komiteti ainalysyp jatyr. Buǵan deiin bul ispen Mańǵystaý oblysynyń Ekonomikalyq tergeý departamenti ainalysqan. Al olar bul isti jaýyp jiberýge tyrysqan», - deidi Kúrentaev.
Onyń sózinshe, bul istiń artynda Qazaqstandy tonaýǵa tyrysqan bir oligarh tur.
«Olardyń (Ekonomikalyq tergeý departamentiniń) áreketin basqa qalai túsine alamyz? Sebebi Ekonomikalyq tergeý departamenti «BatysNefteTreid» JShS-ne qatysty qylmystyq isterdi buǵan deiin de birneshe ret jaýyp tastaǵan. Sonda memlekettik múddeni tek UQK qorǵai ma? Al prokýratýra, antikor, oblys ákimi qaida qarap otyr? Birinshiden, keibir munai ónimderin eksporttaýǵa tyiym salynǵan. Pesh otyny men dizel otynynan memleket biýdjetine túsetin keden salyqtarynyń aiyrmashylyǵy óte kóp, milliard bolýy da múmkin. Ekinshiden, bul jeke menshiktegi tanker. Úshinshiden, tergeý organdary saraptama júrgize almai júrgenine bir jyldai boldy. Bálkim sol saraptamany júrgizgisi de kelmeitin shyǵar», - deidi azamattyq belsendi.
Jarqyn Kúrentaevtyń sózinshe, tergeýdiń toqtap qalýyna birneshe sebep aitylǵan. Sonyń biri - pesh otyny minýs 20 gradýsta qatyp qalǵan desedi.
«Bulardyń basy istemei me, álde bizdi aqymaq kóre me? Minýs gradýsta qatyp qalatyn ol qandai pesh otyny? Munai tankeri kontrabanda quraly retinde Qazaqstan paidasy úshin tárkilenýi qajet! Biraq bireý ony memleketpen bóliskisi kelmei otyr. Al endi oilanyp kóreiikshi, Qazaqstanda munai tankerin tutas iemdenip alýǵa kimniń jaǵdaiy jetedi? Munai óńdeitin zaýytqa kim ielik etýi múmkin? Ázerbaijannyń memlekettik munai kompaniiasymen kelisimshart jasaýǵa kimniń qaýqary jetedi? Ol kim bolsa da onyń Qazaqstanǵa túkirgeni bar. Ol Qazaqstanǵa, qazirgi bilikke qarsy «soǵys ashqan» adam», - deidi Kúrentaev.
Eń qyzyǵy Mańǵystaý oblysynda birneshe jyl buryn «BatysNefteTreid» kompaniiasy 13,5 milliard tonna munaidy saqtaý qyzmeti úshin aqysyn tólegisi kelmegen eken. Olar bul iste sotta jeńilgenimen Joǵary sotta bul iske Jaqyp Asanov aralasqan.
«Bul iske Jaqyp Asanov aralasqannan keiin «BatysNefteTreid» sútten aq, sýdan taza bolyp shyqqan. Memleketke qarsy alpaýyt bireý iske Asanovty qosqan», - deidi Kúrentaev.
Sonymen qatar, «BatysNefteTreid» 3 milliard teńge salyq tólemegen. Al qazirgi tańda salyq kólemi 5 milliardqa jetken bolýy múmkin.
