Siyr etin eksporttaýǵa engizilgen kvota tetigi qazaqstandyq sharýalarǵa qoldanystaǵy kelisimsharttar sheńberinde syrtqy jetkizilimderdi jalǵastyrýǵa múmkindik beredi. Alaida Aýylsharýashylyǵy ministrligi bul rette eksportqa tolyq tyiym salynbaǵanyn naqtylaidy, dep habarlaidy Dalanews.kz.
Ministrliktiń málimetinshe, mundai sheshimdi vedomstvoaralyq komissiia teńgerimdi ári utymdy shara retinde qabyldady.
"Jyl sońyna deiin jetkizýge qatysty qoldanystaǵy kelisimsharttary bar eksporttaýshylar óz mindettemelerin oryndaýdy jalǵastyra alady. Bul sheteldik ótkizý naryqtaryn saqtap qalýǵa, jetkizilimderdiń úzilýine jol bermeýge jáne Qazaqstannyń senimdi jetkizýshi retindegi pozitsiiasyn nyǵaitýǵa múmkindik beredi. Osyǵan bailanysty erekshe atap óter jait: alańdaýǵa sebep joq – eksport josparly rejimde jalǵasady", delingen AShM habarlamasynda.
Quzyrly vedomstvo elimizde siyr eti tapshylyǵy joq ekenin de málimdedi:
"Búginde iri qara mal basy 8,7 mln basqa jetip, onyń ishinde 4,5 mln siyr tirkelgen. Bul ótken jylmen salystyrǵanda 3,1%-ǵa artyq. Tól alý kólemi de aitarlyqtai ósip, 2,7 mln buzaýǵa jetti (ósim 17,9%). Bul kórsetkishter óndiris kólemin odan ári arttyrýǵa negiz qalaidy. 1 tamyzdan bastap ainalym qarajatyn tolyqtyrý úshin bordaqylaýǵa arnalǵan mal satyp alýǵa jeńildetilgen nesie berý baǵdarlamasy iske qosyldy. Bul shara ásirese shaǵyn sharýashylyqtar úshin mańyzdy, sebebi olardyń mal basyn kóbeitýge yntalandyrady".
Sonymen qatar bordaqylaý alańdary men et kombinattaryna tapsyrylǵan ár kilogramm iri qara úshin 300 teńgege deiingi kóterilgen sýbsidiia normasy óndiristiń ósýine qosymsha serpin beredi.
Erekshe kóńil avstraliialyq tehnologiia boiynsha et klasterlerin damytýǵa bólinýde. Bul – bordaqylaý, suryptaý jáne eksportqa shyǵarý boiynsha zamanaýi tásil, ol vertikaldy integratsiialanǵan sharýashylyqtardyń qalyptasýyn qamtamasyz etedi. Ótken jyly pilottyq joba aiasynda jalpy somasy 9 mlrd teńgege 4 joba qarjylandyryldy. Biyl da 11,7 mlrd teńgege 4 joba qoldaý tapty.
Qoldanylyp otyrǵan sharalar Qazaqstanǵa ishki naryqty sapaly siyr etimen turaqty qamtamasyz etip qana qoimai, halyqaralyq naryqtaǵy básekege qabilettilikti de saqtaýǵa múmkindik beredi. Óndiris kólemderi men qoldaý sharalary ishki suranysty tolyq qamtyp, eksporttyq mindettemelerdiń oryndalýyna kepildik beredi.
