Sońǵy kúnderi áleýmettik jelide Balqash qalalyq aýrýhanasyna qatysty sot sheshimi qyzý talqylanyp jatyr, dep habarlaidy dalanews.kz.
Bul isti kópshilikke jetkizip júrgen - kásipker ári qoǵam belsendisi Aitbek Aýlbaev. Ol birneshe jyldan beri qaryndasy Merýert Aýlbaevanyń ólimine kinálilerdiń jaýapqa tartylýyn talap etip keledi.
Aitbek Aýlbaev kópshilikke eń aldymen qaryndasynyń qazasyna bailanysty ádildik izdegen azamat retinde tanyldy. Alaida onyń ómir joly buǵan deiin de aýyr synaqtarǵa toly bolǵan.
2011 jyly Aitbek Aýlbaev aýyr jol-kólik oqiǵasyna túsip, eki kózinen birdei aiyryldy. Dárigerler oǵan kórý júikesiniń atrofiiasy diagnozyn qoiǵan. Soǵan qaramastan ol ómirden qol úzbei, kásipkerlikpen ainalysty, MBA baǵdarlamasyn támamdady, qoǵamdyq jumystarǵa aralasty. Qazir áleýmettik jelide myńdaǵan oqyrmany bar qoǵam belsendisi retinde tanylǵan.
2023 jyly Aitbek Aýlbaevtyń qaryndasy Merýert Aýlbaeva ishi aýyryp, Balqash qalalyq aýrýhanasyna birneshe ret júgingen. Aitbek Aýlbaevtyń aitýynsha, alǵashqy eki ret dárigerler ony úiine qaitarǵan. Tek jaǵdaiy kúrt nasharlaǵan kezde ǵana oǵan appenditsit pen jaiylǵan peritonit diagnozy qoiylyp, shuǵyl ota jasalǵan.
Alaida operatsiiadan keiin áieldiń jaǵdaiy jaqsarmai, sepsis damyǵan. Keiin birneshe márte qaita operatsiia jasalǵanymen, 2023 jyldyń qarasha aiynda Merýert Aýlbaeva qaitys boldy. Aitbek Aýlbaev qaryndasynyń ólimine dárigerlerdiń salǵyrttyǵy sebep boldy dep eseptep, quqyq qorǵaý organdaryna, Densaýlyq saqtaý ministrligine jáne Prezident Ákimshiligine birneshe ret júgindi.
Qoǵam belsendisi birneshe ret jariialaǵan beineúndeýlerinde máseleniń tek óziniń otbasyna qatysty emes ekenin aitqan.
«Men ózim zaǵip adammyn. Biraq bul isti sońyna deiin jetkizemin. XXI ǵasyrda adamdar appenditsitten qaitys bolmaýy kerek. Eger búgin úndemesek, erteń dál osyndai jaǵdai basqa bir otbasynyń basyna túsýi múmkin», – degen bolatyn Aitbek Aýlbaev.
Onyń aitýynsha, basty maqsaty – bir ǵana dárigerdi jazalaý emes, patsientterdiń quqyǵyn qorǵaý jáne meditsinalyq kómektiń sapasyna qoǵam nazaryn aýdarý.
Bir jyldan astam ýaqytqa sozylǵan tergeýden keiin qylmystyq is sotqa joldandy. Al azamattyq talap boiynsha Balqash qalalyq soty talapty ishinara qanaǵattandyrdy.
Aitbek Aýlbaevtyń málimetinshe, sot Balqash qalalyq aýrýhanasynan:
• 2 million teńge materialdyq shyǵyn;
• 10 million teńge moraldyq ótemaqy;
• sot shyǵyndaryn óndirý týraly sheshim shyǵarǵan.
Bul týraly ol óziniń áleýmettik jelidegi paraqshasynda habarlap, mundai sheshim jaqynyn qaitarmaitynyn, biraq ádildikke jasalǵan mańyzdy qadam ekenin jazdy.
Sońǵy ýaqytta Aitbek Aýlbaev áleýmettik jeli arqyly rezonansty isterge pikir bildirip, azamattardyń quqyqtaryn qorǵaý máselelerin kóterip keledi. Ol meditsinalyq qatelikterge qatysty zańnamany jetildirý, dárigerlerdiń jaýapkershiligin kúsheitý jáne patsientterdiń quqyqtaryn qorǵaý máselelerin turaqty túrde qozǵap júr.
Aitbek Aýlbaevtyń aitýynsha, onyń kúresi tek qaryndasynyń isimen shektelmeidi. Ol mundai qaiǵyly oqiǵalardyń qaitalanbaýyna yqpal etetin júieli ózgeristerge qol jetkizýdi maqsat etedi.
