سيىر ەتىن ەكسپورتتاۋعا ەنگىزىلگەن كۆوتا تەتىگى قازاقستاندىق شارۋالارعا قولدانىستاعى كەلىسىمشارتتار شەڭبەرىندە سىرتقى جەتكىزىلىمدەردى جالعاستىرۋعا مۇمكىندىك بەرەدى. الايدا اۋىلشارۋاشىلىعى مينيسترلىگى بۇل رەتتە ەكسپورتقا تولىق تىيىم سالىنباعانىن ناقتىلايدى، دەپ حابارلايدى Dalanews.kz.
مينيسترلىكتىڭ مالىمەتىنشە، مۇنداي شەشىمدى ۆەدومستۆوارالىق كوميسسيا تەڭگەرىمدى ءارى ۇتىمدى شارا رەتىندە قابىلدادى.
"جىل سوڭىنا دەيىن جەتكىزۋگە قاتىستى قولدانىستاعى كەلىسىمشارتتارى بار ەكسپورتتاۋشىلار ءوز مىندەتتەمەلەرىن ورىنداۋدى جالعاستىرا الادى. بۇل شەتەلدىك وتكىزۋ نارىقتارىن ساقتاپ قالۋعا، جەتكىزىلىمدەردىڭ ۇزىلۋىنە جول بەرمەۋگە جانە قازاقستاننىڭ سەنىمدى جەتكىزۋشى رەتىندەگى پوزيسياسىن نىعايتۋعا مۇمكىندىك بەرەدى. وسىعان بايلانىستى ەرەكشە اتاپ وتەر جايت: الاڭداۋعا سەبەپ جوق – ەكسپورت جوسپارلى رەجيمدە جالعاسادى"، دەلىنگەن اشم حابارلاماسىندا.
قۇزىرلى ۆەدومستۆو ەلىمىزدە سيىر ەتى تاپشىلىعى جوق ەكەنىن دە مالىمدەدى:
"بۇگىندە ءىرى قارا مال باسى 8،7 ملن باسقا جەتىپ، ونىڭ ىشىندە 4،5 ملن سيىر تىركەلگەن. بۇل وتكەن جىلمەن سالىستىرعاندا 3،1%-عا ارتىق. ءتول الۋ كولەمى دە ايتارلىقتاي ءوسىپ، 2،7 ملن بۇزاۋعا جەتتى (ءوسىم 17،9%). بۇل كورسەتكىشتەر ءوندىرىس كولەمىن ودان ءارى ارتتىرۋعا نەگىز قالايدى. 1 تامىزدان باستاپ اينالىم قاراجاتىن تولىقتىرۋ ءۇشىن بورداقىلاۋعا ارنالعان مال ساتىپ الۋعا جەڭىلدەتىلگەن نەسيە بەرۋ باعدارلاماسى ىسكە قوسىلدى. بۇل شارا اسىرەسە شاعىن شارۋاشىلىقتار ءۇشىن ماڭىزدى، سەبەبى ولاردىڭ مال باسىن كوبەيتۋگە ىنتالاندىرادى".
سونىمەن قاتار بورداقىلاۋ الاڭدارى مەن ەت كومبيناتتارىنا تاپسىرىلعان ءار كيلوگرامم ءىرى قارا ءۇشىن 300 تەڭگەگە دەيىنگى كوتەرىلگەن سۋبسيديا نورماسى ءوندىرىستىڭ وسۋىنە قوسىمشا سەرپىن بەرەدى.
ەرەكشە كوڭىل اۆستراليالىق تەحنولوگيا بويىنشا ەت كلاستەرلەرىن دامىتۋعا بولىنۋدە. بۇل – بورداقىلاۋ، سۇرىپتاۋ جانە ەكسپورتقا شىعارۋ بويىنشا زاماناۋي ءتاسىل، ول ۆەرتيكالدى ينتەگراسيالانعان شارۋاشىلىقتاردىڭ قالىپتاسۋىن قامتاماسىز ەتەدى. وتكەن جىلى پيلوتتىق جوبا اياسىندا جالپى سوماسى 9 ملرد تەڭگەگە 4 جوبا قارجىلاندىرىلدى. بيىل دا 11،7 ملرد تەڭگەگە 4 جوبا قولداۋ تاپتى.
قولدانىلىپ وتىرعان شارالار قازاقستانعا ىشكى نارىقتى ساپالى سيىر ەتىمەن تۇراقتى قامتاماسىز ەتىپ قانا قويماي، حالىقارالىق نارىقتاعى باسەكەگە قابىلەتتىلىكتى دە ساقتاۋعا مۇمكىندىك بەرەدى. ءوندىرىس كولەمدەرى مەن قولداۋ شارالارى ىشكى سۇرانىستى تولىق قامتىپ، ەكسپورتتىق مىندەتتەمەلەردىڭ ورىندالۋىنا كەپىلدىك بەرەدى.
