Osydan 32 jyl buryn toptyq zorlyq kórgenin aitqan Natalia Qalymbetova Prezident Qasym-Jomart Toqaevqa beineúndeý jasap, qylmystyq istiń tergelýin jeke baqylaýyna alýdy surady, dep habarlaidy dalanews.kz.
Jábirlenýshiniń aitýynsha, uzaq jyldar buryn bolǵan qylmys boiynsha tergeý toqyraýǵa tirelgen. Onyń sózinshe, is boiynsha kúdiktiler de, kýágerler de joq, al basty dálel retinde AQSh-ta turyp jatqan qyzy ǵana qalǵan.
«Qazir is bir orynda tur. Sebebi kýágerler de, dálelder de joq. Jalǵyz dálelim – meni aiaýsyz zorlaǵan adamdardan dúniege kelgen qyzym. Meniń bilýimshe, qyzym AQSh-ta turady. Eger DNQ saraptamasy júrgizilse, ákelik faktisi anyqtalyp, qylmys dáleldener edi», – dedi Natalia Qalymbetova.
Onyń aitýynsha, 17 jasynda birneshe adamnyń zorlyǵyna ushyraǵannan keiin júkti bolǵan. Alaida otbasy men oqý orny ákimshiliginiń qysymymen dúniege kelgen qyzyn perzenthanada qaldyrýǵa májbúr bolǵan. Keiin sábi basqa otbasyǵa asyrap berilgen.
Jábirlenýshi tergeý organdary DNQ saraptamasyn júrgizýge qatysty naqty nátije kórsetpei otyrǵanyn aityp, Memleket basshysynan isti jeke baqylaýyna alýdy ótindi.
Buǵan deiin Natalia Qalymbetova áleýmettik jelide 32 jyl buryn Batys Qazaqstan oblysyndaǵy aýyldardyń birinde tórt jergilikti turǵynnyń tarapynan toptyq zorlyqqa ushyraǵanyn málimdegen bolatyn. Qoǵamdyq rezonanstan keiin Batys Qazaqstan oblysynyń politsiia departamenti qylmystyq is qozǵady.
Tergeý áreketterine qatysý úshin Qalymbetova Tailandtan Qazaqstanǵa kelip, oqiǵa ornyna baryp, resmi jaýap bergen. Alaida qazirgi ýaqytta is boiynsha eshkim kúdikti retinde tanylmaǵan jáne eshkim ustalǵan joq.
