Qazaqstanda eńbek qyzmetin júzege asyrý úshin jumys berýshilerge sheteldik jumys kúshin tartýǵa ruqsat berilgen shekti sany 2020 jylǵa respýblikadaǵy jumys kúshiniń sanyna qatysty 29 292 birlikti nemese 0,32%-dy qurady, dep habarlaidy Dalanews.kz.
Kvota 2019 jyly bekitilgen sanymen (48 700 birlik) salystyrǵanda 40% – ǵa, onyń ishinde 3 sanat boiynsha (mamandar) – 37%-ǵa jáne 4 sanat boiynsha (bilikti jumysshylar) – 23%-ǵa qysqartyldy.
Aqtóbe, Batys Qazaqstan, Qyzylorda jáne Soltústik Qazaqstan oblystary 4 sanat boiynsha sheteldik jumyskerlerdi tartýdan tolyqtai bas tartyp, jumys berýshilerdiń qajettiligin jergilikti mamandar esebinen jabýdy josparlap otyr.
Kvotany qabyldaý ishki eńbek naryǵyn bilikti emes sheteldik jumys kúshinen qorǵaýǵa, qazaqstandyq kadrlardy kóbirek jumysqa ornalastyrýǵa múmkindik beredi, sondai-aq jumys berýshilerdiń bilikti sheteldik jumys kúshine degen suranysyn qanaǵattandyrady.
"Ekinshi jartyjyldyqta Bas prokýratýramen birlesip 30-dan asa sheteldik mamandy jumysqa tartqan 105 iri óndiris ornyn tekserdik.
Nátijesinde eńbek kóshi-qony zańnamasyn buzǵan 1000-nan asa jait anyqtaldy. Buǵan qosa 27 kompaniianyń ailyq tóleý máselesinde teńsizdikke jol bergenin anyqtadyq, mundai 470 fakti tirkeldi. Birden shara qoldandyq. 397 ákimshilik is qozǵalyp, jalpy somasy 100 mln-nan asatyn aiyppul salyndy.
Budan buryn ruqsat berilgen 703 ruqsatnamany keri qaitardyq, 507 sheteldik jumysshy elderine qaitty. Olardyń ishinde – 250 qytai, 43 aǵylshyn jáne 40 alban azamaty bar", – dedi Eńbek jáne áleýmettik qorǵaý ministri Birjan Nurymbetov.
Ministrdiń aitýynsha sheteldik jumys kúshin tartý kvotasy biyl 29 myń adamnan aspaýy tiis. Byltyr bul kórsetkish 49 myń birlikti quraǵan bolatyn.
"29 myń birlik – shekti deńgei. Eldegi sheteldik jumysshy sany osy mejeden aspaýy tiis.
1 tamyzǵa deiin kompaniialar jergilikti atqarýshy organyna biyldyqqa qansha sheteldik mamandy jumysqa tartatynyn habarlaýy tiis.
Jergilikti atqarýshy organdar zańǵa sai sheshim qabyldaý, álgi kompaniialardyń ótinishin bizdiń ministrlikke jiberedi, – deidi Eńbek jáne áleýmettik qorǵaý ministri.
