QR Qarjy ministrliginiń Memlekettik kirister komiteti adamǵa baǵdarlanǵan tásildi keńeitip, salyq salý salasyndaǵy memlekettik qyzmetterdiń sapasyn arttyrý boiynsha jumysty jalǵastyrýda. Atalǵan maqsatta barlyq memlekettik kirister organdarynda "qyzyl túime" - QR-kod ornalastyrylǵan. Ony skanerleý arqyly salyq tóleýshiler naqty problemalyq jaǵdaidy kórsete otyryp, Memlekettik kirister komitetiniń tóraǵasyna tikelei júginý múmkindigine ie bolady, dep habarlaidy Dalanews.kz.
Aita ketsek, "qyzyl túime" tek salyqtyq jáne kedendik qyzmetterdi alý barysynda týyndaityn qiyndyqtar jónindegi habarlamalar úshin arnalǵan. Bul mehanizm qyzmetkerler tarapynan jiberilgen teris qylyqtardy, quqyqbuzýshylyqtardy nemese adal emes áreketterdi anyqtaýǵa jáne aldyn alýǵa baǵyttalǵan sybailas jemqorlyqqa qarsy saiasattyń bir bóligi bolyp tabylady.
Ótinish nysany qarapaiym jáne intýitivti túrde túsinikti, ony birneshe minýt ishinde toltyrýǵa bolady. Qajet bolǵan jaǵdaida ótinishti anonimdi túrde de qaldyrýǵa bolady.
Memlekettik kirister komiteti memlekettik qyzmetterdi alý kezinde kedergilerge nemese sapasyz qyzmet kórsetýge tap bolǵan azamattardy osy múmkindikti paidalanýǵa shaqyrady.
"Sizdiń daýysyńyz salyqtyq jáne kedendik ákimshilendirý júiesiniń tiimdi, ashyq jáne klientke baǵdarlanǵan bolýyna yqpal etetin mańyzdy qural. Memleket pen qoǵamnyń birlesken kúsh-jigeri ǵana qyzmet kórsetý sapasyn arttyryp, senim deńgeiin kótere alady", delingen habarlamada.
