Sáýir men maýsym aralyǵynda Qazaqstanda reseilik quryltaishylary bar jumys istep turǵan kásiporyndar sany 728-ge qysqaryp, 17,6 myńǵa jetti. Bul týraly Birinshi kredittik biýro sarapshylary málimdedi, dep habarlaidy Dalanews.kz.
Bul — kem degende 2019 jyldyń basynan bergi eń iri tómendeý. Reseilik kompaniialardyń sany qatarynan 15 ai boiy qysqaryp keledi. 2024 jylǵy 1 sáýirdegi jaǵdai boiynsha mundai kásiporyndar sany 19,7 myń bolǵan.
"Teris dinamika reseilik biznestiń barlyq salasyna áser etti. Jalpy qysqarýdyń 55 paiyzyn eń iri eki sala – saýda men aqparattyq tehnologiialar qurady", – dep atap ótti sarapshylar.
Al Ózbekstan quryltaishylary bar kásiporyndar sany ekinshi toqsanda 527-ge artyp, shamamen 5400-ge jetken. Qytai quryltaishylary bar kompaniialar sany da 500-ge ósip, 4500 shamasynda boldy.
"Ózbekstandyq kásipkerlerdiń belsendiligi negizinen "basqa qyzmetter" salasynda baiqalsa, qytailyq kompaniialar sany kóbinese saýda salasy esebinen artty", – dedi mamandar.
