Сәуір мен маусым аралығында Қазақстанда ресейлік құрылтайшылары бар жұмыс істеп тұрған кәсіпорындар саны 728-ге қысқарып, 17,6 мыңға жетті. Бұл туралы Бірінші кредиттік бюро сарапшылары мәлімдеді, деп хабарлайды Dalanews.kz.
Бұл — кем дегенде 2019 жылдың басынан бергі ең ірі төмендеу. Ресейлік компаниялардың саны қатарынан 15 ай бойы қысқарып келеді. 2024 жылғы 1 сәуірдегі жағдай бойынша мұндай кәсіпорындар саны 19,7 мың болған.
"Теріс динамика ресейлік бизнестің барлық саласына әсер етті. Жалпы қысқарудың 55 пайызын ең ірі екі сала – сауда мен ақпараттық технологиялар құрады", – деп атап өтті сарапшылар.
Ал Өзбекстан құрылтайшылары бар кәсіпорындар саны екінші тоқсанда 527-ге артып, шамамен 5400-ге жеткен. Қытай құрылтайшылары бар компаниялар саны да 500-ге өсіп, 4500 шамасында болды.
"Өзбекстандық кәсіпкерлердің белсенділігі негізінен "басқа қызметтер" саласында байқалса, қытайлық компаниялар саны көбінесе сауда саласы есебінен артты", – деді мамандар.
