"Halqy 140 mln RF-da bir jylda tólengen aiyppuldar somasy - 1,2 mlrd teńge (237,6 mln rýbl)! Al halqy nebári 20 mln Qazaqstanda tólengen aiyppuldar somasy - 120 mlrd teńge!". Facebook-taǵylardyń "Jer astynan jeti qoian tapqandai" shýlasyp, osy bir málimettiń bólisip jatqanyna bir aptanyń júzi boldy. "Apam da tań, men de tań" demekshi, jurtty airan-asyr qylǵan bul málimettiń shynaiylyǵyn ekonomist Ǵalymjan Aitqazin tekserip kórdi, dep jazady Dalanews.kz.
Onyń aitýynsha, bul málimetti jazǵan adam asyǵystyq jasaǵan nemese shynymen de saýatsyz.
"Bul suraqty biz de Google-ge salyp kórdik. Sodan bul aradaǵy 237,6 mln degen rýbl emes, tólengen aiyppuldar sany ekeniniń kýási boldyq" dep jazady Tengenomika Telegram arnasynyń avtory.
Osylai degen ekonomist báribir ary qarai tsifrlardy qazbalap kórýdi jón kóripti. Sóitip ol 2023 jyldyń qorytyndysy boiynsha Qazaqstan men RF-daǵy kólik qozǵalysy erejelerin buzǵandarǵa qatysty ashyq derekózderdegi aiyppuldarǵa salystyrmaly túrde taldaý jasaidy.
Qazaqstanda:
- jalpy buzýshylyqtar: 8,2 mln jaǵdai.
- aiyppuldardyń jalpy somasy: 93,3 mlrd teńge.
- bir adamǵa keletin ortasha aiyppul somasy: 4 665 teńge.
Resei Federatsiiasynda:
- jalpy buzýshylyqtar: 237,6 mln jaǵdai.
- aiyppuldardyń jalpy somasy: 170,2 mlrd rýbl (719,1 mlrd teńge).
- bir adamǵa keletin ortasha aiyppul somasy: 5 136 teńge.
"Iaǵni, eseptei kelgende Reseidiń bir turǵynyna keletin aiyppul somasy 5 136 teńgeni quraidy, bul - Qazaqstandaǵydan 10%-ǵa artyq (bir adamǵa 4 665 teńge) kólem. Bul kórshiles eki elde aiyppuldardy taǵaiyndaý tásilderiniń salystyrmaly túrde uqsastyǵyn kórsetedi jáne eki, úsh nemese 100 eseden astam aiyrmashylyq týraly bul arada múlde sóz joq", dep qorytyndylaidy óz oiyn Ǵalymjan Aitqazin.
Buǵan deiin maman aiyppuldardy ońdy-soldy burqyratqan IIM nazaryn qyzyqty bir tsifrlarǵa burǵan edi.
