"حالقى 140 ملن رف-دا ءبىر جىلدا تولەنگەن ايىپپۇلدار سوماسى - 1،2 ملرد تەڭگە (237،6 ملن رۋبل)! ال حالقى نەبارى 20 ملن قازاقستاندا تولەنگەن ايىپپۇلدار سوماسى - 120 ملرد تەڭگە!". Facebook-تاعىلاردىڭ "جەر استىنان جەتى قويان تاپقانداي" شۋلاسىپ، وسى ءبىر مالىمەتتىڭ ءبولىسىپ جاتقانىنا ءبىر اپتانىڭ ءجۇزى بولدى. "اپام دا تاڭ، مەن دە تاڭ" دەمەكشى، جۇرتتى ايران-اسىر قىلعان بۇل مالىمەتتىڭ شىنايىلىعىن ەكونوميست عالىمجان ايتقازين تەكسەرىپ كوردى، دەپ جازادى Dalanews.kz.
ونىڭ ايتۋىنشا، بۇل مالىمەتتى جازعان ادام اسىعىستىق جاساعان نەمەسە شىنىمەن دە ساۋاتسىز.
"بۇل سۇراقتى ءبىز دە Google-گە سالىپ كوردىك. سودان بۇل اراداعى 237،6 ملن دەگەن رۋبل ەمەس، تولەنگەن ايىپپۇلدار سانى ەكەنىنىڭ كۋاسى بولدىق" دەپ جازادى Tengenomika Telegram ارناسىنىڭ اۆتورى.
وسىلاي دەگەن ەكونوميست ءبارىبىر ارى قاراي سيفرلاردى قازبالاپ كورۋدى ءجون كورىپتى. ءسويتىپ ول 2023 جىلدىڭ قورىتىندىسى بويىنشا قازاقستان مەن رف-داعى كولىك قوزعالىسى ەرەجەلەرىن بۇزعاندارعا قاتىستى اشىق دەرەكوزدەردەگى ايىپپۇلدارعا سالىستىرمالى تۇردە تالداۋ جاسايدى.
قازاقستاندا:
- جالپى بۇزۋشىلىقتار: 8،2 ملن جاعداي.
- ايىپپۇلداردىڭ جالپى سوماسى: 93،3 ملرد تەڭگە.
- ءبىر ادامعا كەلەتىن ورتاشا ايىپپۇل سوماسى: 4 665 تەڭگە.
رەسەي فەدەراسياسىندا:
- جالپى بۇزۋشىلىقتار: 237،6 ملن جاعداي.
- ايىپپۇلداردىڭ جالپى سوماسى: 170،2 ملرد رۋبل (719،1 ملرد تەڭگە).
- ءبىر ادامعا كەلەتىن ورتاشا ايىپپۇل سوماسى: 5 136 تەڭگە.
"ياعني، ەسەپتەي كەلگەندە رەسەيدىڭ ءبىر تۇرعىنىنا كەلەتىن ايىپپۇل سوماسى 5 136 تەڭگەءنى قۇرايدى، بۇل - قازاقستانداعىدان 10%-عا ارتىق (ءبىر ادامعا 4 665 تەڭگە) كولەم. بۇل كورشىلەس ەكى ەلدە ايىپپۇلداردى تاعايىنداۋ تاسىلدەرىنىڭ سالىستىرمالى تۇردە ۇقساستىعىن كورسەتەدى جانە ەكى، ءۇش نەمەسە 100 ەسەدەن استام ايىرماشىلىق تۋرالى بۇل ارادا مۇلدە ءسوز جوق"، دەپ قورىتىندىلايدى ءوز ويىن عالىمجان ايتقازين.
بۇعان دەيىن مامان ايىپپۇلداردى وڭدى-سولدى بۇرقىراتقان ءىىم نازارىن قىزىقتى ءبىر سيفرلارعا بۇرعان ەدى.
