Qosymsha qun salyǵy (QQS) mólsherlemesin kóterýge qarsy petitsiia búgin e-petition.kz saitynda jariialanyp, alǵashqy saǵattarda 1500-den asa qaralym jinap, 300-den asa adam daýys berip úlgergen. Petitsiia avtory, salyq jónindegi keńesshi Faizirhaman Miianov QQS mólsherlemesin kóterý jobasy Ulttyq ekonomika ministrliginiń biýdjetti tolyqtyrý usynysy turǵysynan ǵana qarastyrylyp, bul rette biznestiń jáne jalpy el azamattarynyń pikiri eskerilmei otyrǵanyn aitady, dep jazady Dalanews.kz.
Mamannyń aitýynsha, barlyq qazaqstandyq: meili ol tutynýshy bolsyn, jeke tulǵa bolsyn, salyq tóleýshi bolsyn engizilgeli jatqan ózgeristi sezinetin bolady. Óitkeni mundaida biznes pen qoǵamdy damytý úshin qolaily jaǵdailar jasaýǵa baǵyttalǵan kásipkerlik sýbektileri men memlekettiń ózara is-qimylyn qamtityn basty maqsat buzylady.
"2025 jyly 28 qańtarda Memleket basshysy Qasym-Jomart Toqaevtyń tóraǵalyǵymen ótken Úkimettiń keńeitilgen otyrysynda Úkimet basshysy Oljas Bektenov jańa salyq reformasy sheńberinde QQS mólsherlemesin 15%-dan 20%-ǵa arttyrý kerek ekenin málimdedi. Al QR Ulttyq ekonomika ministri Serik Jumanǵarin 2025-20229 jyldarǵa arnalǵan respýblikalyq biýdjet ólshemderiniń boljamymen qatar mynalardy usyndy: 1) QQS tirkeý shegin 3 815 AEK-ke deiin tómendetý (jylyna 15 mln teńge) 2) QQS mólsherlemesin 2025 jylǵy qazannan bastap bir mezgilde 20% - ǵa deiin ulǵaitý", delingen petitsiiada.
Petitsiia avtorlary munymen kelispeidi, sóitip 2024 jylǵy 7 aqpandaǵy Memleket basshysy Qasym-Jomart Toqaevtyń sózin keltiredi. Ol kezde Prezident daiyndalyp jatqan Salyq kodeksine kóńili tolmaitynyn aitqan edi:
"Qazirgi tańda Salyq kodeksi daiyndalyp jatyr. Bul qujat investorlarǵa qolaily jaǵdai jasap, biýdjetke kólemdi qarjy túsýin qamtamasyz etýi qajet. Alaida, Qazaqstanda túpki máni ózgerip ketken qosymsha qun salyǵynyń ózin reformalaý qajet. Ony 12 paiyzdan 16 paiyzǵa deiin kóterý máseleni sheshpeidi. Sarapshylar qosylǵan qun salyǵyn kóterý kóleńkeli ekonomikanyń úlesin arttyryp, infliatsiianyń ósýine ákep soqtyrýy yqtimal dep oryndy pikir bildirip jatyr. Bul qadam elimizdiń investitsiialyq tartymdylyǵyna da keri áser etýi múmkin", degen edi Prezident.
Iaǵni, narazylyq bildirýshiler qosymsha qun salyǵynyń ózin reformalaý kerek dep sanaidy.
Buǵan deiin saitymyzda "QQS mólsherlemesin arttyrýǵa qarsymyz! Biznes qaýymdastyq petitsiia jobasyn ázirlep jatyr" degen maqala shyqqan. "Elimizde qosymsha qun salyǵyn ósirý kózdelip otyr. sarapshylar qaýymy buǵan nege qarsy" degen maqalamen de tanysa otyryńyzdar.
