Tamyzda Qazaqstan turǵyndary aiyrbastaý pýnktterinen qolma-qol rýbldi burynǵydan áldeqaida kóp satyp aldy. Ulttyq bank málimetinshe, aiyrbastaý oryndarynyń rýbl satý kólemi satyp alý kóleminen 6,2 mlrd teńgege asyp túsken. Bul shildedegi kórsetkishten shamamen 49 ese kóp, dep habarlaidy dalanews.kz.
Data hub málimetinshe, aiyrbastaý pýnktteri halyqtan satyp alǵan rýblge qaraǵanda, turǵyndarǵa kóbirek rýbl satqan. Mundai jaǵdai ekinshi ai qatarynan tirkelip otyr.
2022 jylǵy sáýirge deiin Qazaqstanda qolma-qol rýblge suranys joǵary bolǵan. Ol kezde ai saiynǵy taza satylym ondaǵan milliard teńgege jetetin. Keiin halyqtyń rýblge qyzyǵýshylyǵy tómendep, keibir kezeńderde turǵyndar ony satyp alýdan góri aiyrbastaý pýnktterine kóbirek ótkizgen. Máselen, mundai jaǵdai 2024 jylǵy jeltoqsannan 2026 jylǵy aqpanǵa deiin 14 ai boiy jalǵasty.
Soǵan qaramastan, tamyzdaǵy kúrt ósimge qarap, rýblge turaqty suranys qaita qalyptasty deýge áli erte. 2026 jyldyń alǵashqy segiz aiynyń tek tórteýinde ǵana aiyrbastaý pýnktteri halyqqa qabyldaǵanynan kóbirek rýbl satqan. Qazirgi kórsetkishter 2022 jylǵy sáýirge deiingi deńgeiden áli de áldeqaida tómen.
Rýblge suranystyń artýy Resei valiýtasy arzandaǵan kezeńmen tuspa-tus keldi. Tamyzda teńge rýblge qatysty 10,1 paiyzǵa nyǵaiyp, sońǵy bir jarym jyldan astam ýaqyttaǵy eń joǵary deńgeiine jetti. Iaǵni turǵyndar rýbldiń baǵasy tómendegen kezde ony kóbirek satyp ala bastaǵan.
Rýbl satylymynyń ósýine Pavlodar, Shyǵys Qazaqstan, Qaraǵandy jáne Qostanai oblystary kóbirek áser etti. Osy tórt óńir tamyzdaǵy jalpy ósimniń 60 paiyzyn qamtamasyz etken.
Dollarǵa suranys artty, eýroǵa qyzyǵýshylyq azaidy
Tamyzda aiyrbastaý pýnktteri halyqqa satyp alǵanynan 141,4 mlrd teńgege artyq dollar satqan. Bul kórsetkish bir aida 15 paiyzǵa, bir jylda 2 paiyzǵa ósti.
Al eýroǵa suranys aitarlyqtai tómendedi. Onyń taza satylymy 2,1 mlrd teńgeni qurap, keiingi 14 aidaǵy eń tómengi deńgeige tústi. Kórsetkish shildemen salystyrǵanda 81 paiyzǵa, ótken jyldyń tamyzymen salystyrǵanda 69 paiyzǵa azaiǵan.
