Qazaqstanda Prezident Qasym-Jomart Toqaevtyń ár jyldary aitqan mańyzdy sózderi men baiandamalarynan quralǵan «Ádiletti qoǵamǵa – shynshyl sóz» atty kitap jaryq kórdi, dep habarlaidy dalanews.kz.
Jinaqqa Memleket basshysynyń 1994 jyldan bergi arhivtik materialdary men sońǵy sózderinen iriktelgen úzindiler engizilgen. Basylymda Qazaqstanda jáne halyqaralyq alańdarda aitylǵan negizgi oilar toptastyrylǵan.
Kitap 21 taqyryptyq bólimnen turady. Onda zań ústemdigi, qoǵamdyq qaýipsizdik, memlekettik basqarý, bilim, jastar, tsifrlandyrý, ulttyq biregeilik, ekologiialyq mádeniet jáne «Taza Qazaqstan» bastamasy sekildi baǵyttar qamtylǵan.
Jinaq memlekettik qyzmetshilerge, oqytýshylarǵa, stýdentterge, zertteýshilerge jáne Qazaqstannyń qazirgi tarihyna qyzyǵýshylyq tanytatyn oqyrmandarǵa arnalǵan. Aldaǵy ýaqytta kitap qoǵamdyq kitaphanalarǵa, joǵary oqý oryndaryna, kolledjderge, saiasi partiialarǵa jáne jastar resýrstyq ortalyqtaryna taratylmaq.
Kitaptyń jaryq kórgeni týraly áleýmettik jelide jariialaǵan jazbasynda saiasattanýshy Arman Qyryqbaev bul jinaqty Memleket basshysynyń Qazaqstandy ádiletti, qaýipsiz jáne órkendegen elge ainaldyrýǵa baǵyttalǵan ustanymdarynyń sózben berilgen kórinisi dep baǵalady.
Onyń aitýynsha, jinaqqa engen oilar Prezidenttiń sońǵy 30 jyldan astam ýaqyt ishinde qalyptasqan kózqarastary men qundylyqtaryn kórsetedi.
«Osy jinaqty qurastyrý kezinde kózimiz jetken anyq jait, kúrdeli ári ótpeli kezeńde memleketke basshylyq etetin tulǵanyń el bolashaǵy men ult sapasy týraly kózqarasy ondaǵan jyl buryn qalyptasqan. Keiin bul ustanymdar ómirlik jáne kásibi tájiribe arqyly júielenip, búgingi memlekettik saiasattyń negizgi baǵyttaryna ainaldy», – dep jazdy Arman Qyryqbaev.
Sondai-aq ol kitaptyń maqsaty Prezidenttiń júrgizip otyrǵan saiasatynyń negizgi qaǵidalaryn onyń óz sózderi arqyly kórsetý ekenin atap ótti.
«Memleketimizdiń búgini men erteńin oilaityn, eldiń damý baǵytyn tereńirek túsingisi keletin azamattardy osy kitapty oqýǵa shaqyramyn», – dedi ol.
