Sheteldik bankterden Qazaqstan naryǵyna kelý úshin talap etiletin aktiv kólemi 20 mlrd dollardan 10 mlrd dollarǵa deiin tómendetilmek. Búgin Májilistiń jalpy otyrysynda Qarjy naryǵyn retteý jáne damytý agenttiginiń tóraǵasy Mádina Ábilqasymova depýtattar talqysyna osyndai ózgeristi qamtityn zań jobasyn usyndy, dep habarlaidy Dalanews.kz.
Ol 2020 jyly Qazaqstanda sheteldik bankter jumys isteýi úshin eń keminde 20 mlrd dollar aktivi bolýy kerek dep shek belgilengenin eske saldy. Mine, sodan beri bir de bir sheteldik bank bizdiń naryqqa basyn suqpaǵan.
Qarjy naryǵyn damytý jáne qarjylyq qyzmetterdi tutynýshylardyń quqyqtaryn qorǵaý máseleleri jónindegi zań jobasynda osy shek 10 mlrd dollarǵa deiin tómendetý usynylyp otyr.
Sondai-aq Mádina Ábilqasymova ruqsat berý protsesin ońtailandyrý da josparlanyp otyrǵanyn jetkizdi.
"Sheteldik investorlarǵa qoiylatyn talaptardy yryqtandyrý úshin ruqsat alý qujattar tizbesin qysqartý kózdeledi. Qujattar sany sheteldegi bas banktiń reitingine bailanysty bolady. Sonymen, "BB -" - den "A -" deiingi reitingidegi sheteldik bankter úshin Qazaqstanda enshiles bank ashýǵa arnalǵan ruqsat berý qujattary 24-ten 17-ge deiin, al filial ashýǵa degeni 20 - dan 10-ǵa deiin qysqarady. "A-" jáne odan joǵary reitingtegi bankter úshin qujattar sany 10-8-ge deiin qysqarady", - dedi Mádina Ábilqasymova.
Sondai-aq, onyń aitýynsha, úsh sheteldik bank Qazaqstanda óz filialdaryn ashýǵa nietti.
"Biz sheteldik banktermen kelissózder júrgizdik. Olardyń birnesheýi Qazaqstanda óz filialdaryn ashýǵa qyzyǵýshylyq bildirdi. Eń aldymen, biz olardyń aktivterin tekseremiz. Biz, negizinen, Qazaqstanmen tyǵyz ekonomikalyq qarym-qatynastaǵy elderdi qarastyramyz. Olar - aziialyq jáne arab elderi, Túrkiia jáne Qytai", - dedi Mádina Ábilqasymova.
Ábilqasymova Ońtústik Koreianyń BNK Financial Group Inc. qarjy toby Qazaqstanda bank ashýǵa ruqsat alǵanyn naqtylai ketti. Úsh jyl buryn olar shaǵyn nesie uiymyn ashqan, endi sonyń negizinde bank qurylady. Ekinshisi - Bereke Bank-ti satyp alǵan Katar eli. Úshinshi bank - ADCB. Ol BAÁ-degi aktivter kólemi boiynsha úshinshi orynda turǵan iri bank.
Aita ketsek, 2024 jyly 10 qazanda Bereke Bank-tiń direktorlar keńesiniń quramynda ózgerister bolǵanyn habarlaǵanbyz. Ersaiyn Hamitov pen Viacheslav Son óz erikterimen Bereke Banktiń direktorlar keńesiniń quramynan shyqty. Engizilgen ózgeristerden soń "Bereke Bank" AQ-tyń direktorlar keńesi endi tórt adamnan turady: Asqar Elemesov, Maǵjan Mádiev, Maqsat Nuridenuly, Andrei Timchenko.
