Qazaqstanda 2025 jyly azamattardyń jańa nesiege bergen ótinimderi 13,7%-ǵa qysqarǵan. Bul týraly Qarjygerler qaýymdastyǵynyń taldaý ortalyǵy málimdedi, dep habarlaidy Dalanews.kz.
Naryqtaǵy negizgi tómendeý kepilsiz nesielerge tiesili boldy. Barlyq ótinimniń 91%-yn quraityn bul segment 16,9%-ǵa qysqarǵan. Al basqa baǵyttarda, kerisinshe, suranys artqan. Ipotekalyq nesieler – 9,2%-ǵa, avtonesieler – 41,8%-ǵa, al kepilmen beriletin tutynýshylyq nesieler – 77,1%-ǵa ósken.
Sarapshylardyń aitýynsha, biregei qaryz alýshylar sany 57 myń adamǵa azaiǵan. Bul halyqtyń qaryz alýǵa saqtyqpen qarai bastaǵanyn jáne naryqtyń jańa klientter tartý múmkindigi shektele bastaǵanyn kórsetedi.
Jańa berilgen nesieler kólemi de baiaý ósim kórsetken: nebári 8,7%. Al byltyrǵy kórsetkish 21,9% bolǵan. Sonymen qatar bólshek nesieler portfeli 19,8%-ǵa ulǵaiǵan.
Ortasha paiyzdyq mólsherleme 18,2%-ǵa deiin kóterildi. Nesie ótinimderin maquldaý deńgeii 29,2%-dan 26,2%-ǵa deiin tómendedi. Bankter bazalyq mólsherlemeniń ósýi men talaptardyń kúsheiýine bailanysty qaryz alýshylardy irikteýdi qatańdatqan.
Sonymen qatar merzimi ótken bereshek kólemi de artqan. Iaǵni, 2,9%-dan 4,0%-ǵa deiin ósti. Bul negizinen tutynýshylyq nesie segmentindegi jaǵdaimen bailanysty.
Aita keteiik, bir jyl buryn bul kórsetkish kerisinshe 13,8%-ǵa ósim kórsetken edi. Osylaisha, keiingi jyldardaǵy ósim úrdisi alǵash ret báseńdedi.
