Qazaqstanda tutynýshylyq nesieleýdiń ósý qarqyny aitarlyqtai baiaýlady. Qarjy naryǵyn retteý jáne damytý agenttiginiń (QNRDA) málimetinshe, kepilsiz tutynýshylyq nesie portfeliniń ósimi sońǵy alty jyldaǵy eń tómengi deńgeige jetken, dep habarlaidy dalanews.kz.
Agenttik deregine sáikes, 2021–2024 jyldary bankterdiń kepilsiz tutynýshylyq nesie portfeli jylyna orta eseppen 32%-ǵa ulǵaisa, 2025 jyldyń qorytyndysynda bul kórsetkish 14,6%-ǵa deiin tómendegen. Al 2026 jyldyń alǵashqy alty aiynda ósim nebári 3,1%-dy quraǵan.
"Bul dinamika sońǵy jyldary qabyldanǵan makroprýdentsiialyq sharalardyń nátijesin kórsetedi. Atap aitqanda, nesie berý talaptary kúsheitilip, kepilsiz nesieler boiynsha shekti syiaqy mólsherlemeleri tómendetildi, qaryz somasy men merzimine shekteýler engizildi. Sondai-aq qaryz alýshylardyń tólem qabiletin baǵalaý talaptary kúsheitilip, merzimi ótken bereshegi bar azamattarǵa jańa nesie berýge shekteý qoiyldy", - delingen QNRDA habarlamasynda.
Vedomstvonyń málimetinshe, qabyldanǵan ózgeristerdiń nátijesinde bankter nesie berý kezinde táýekeldi muqiiat baǵalai bastady. Sonyń saldarynan, ásirese, qaryz júktemesi joǵary azamattar úshin nesie alý qiyndai túsken.
QNRDA mundai úrdis halyqtyń shamadan tys qaryzǵa batý qaýpin azaitýǵa múmkindik beretinin atap ótti. Sonymen qatar agenttik aldaǵy ýaqytta aqsha-nesie saiasatynyń jumsarýy men nesielerdiń arzandaýy jaǵdaiynda bul úrdistiń saqtalýy mańyzdy bolatynyn jetkizdi.
