Qazaqstanda jańa Konstitýtsiianyń qabyldanýyna bailanysty qylmystyq jáne ákimshilik raqymshylyq jasaý josparlanyp otyr. Tiisti zań jobasyn Májilis birinshi oqylymda maquldady, dep habarlaidy dalanews.kz.
Zań jobasyn tanystyrǵan Májilis depýtaty Abzal Quspan raqymshylyq Memleket basshysynyń biylǵy 17 naýryzda bergen tapsyrmasy aiasynda ázirlengenin aitty. Onyń sózinshe, Qazaqstan tarihynda alǵash ret qylmystyq jáne ákimshilik raqymshylyq qatar júrgizilmek.
«Bul qatelik jibergen, biraq óz isine ókinip, minez-qulqymen túzelý jolyna túskenin dáleldegen adamdarǵa qatysty memleketimiz tarapynan jasalǵan kezekti izgilik aktisiniń kórinisi», - dedi depýtat.
Zań jobasyna sáikes, qylmystyq raqymshylyq aiasynda qylmystyq teris qylyqtar, onsha aýyr emes qylmystar, sondai-aq keltirilgen ziian tolyq ótelgen nemese múlde ziian keltirilmegen ortasha aýyrlyqtaǵy qylmystar boiynsha qozǵalǵan ister toqtatylýy múmkin. Bul norma tergeý organdary men sottardyń óndirisindegi isterge de qatysty bolady.
Sonymen qatar atalǵan sanattar boiynsha sottalǵan azamattardy jazadan bosatý jáne ortasha aýyr qylmystar úshin sottalǵandardyń ótelmegen jaza merzimin eki esege qysqartý usynylyp otyr. Aýyr jáne asa aýyr qylmystar úshin sottalǵandardyń da jaza merzimin qysqartý kózdelgen.
«Ortasha aýyr qylmystar úshin sottalǵandardyń jazasynyń ótelmegen merzimin 1/2 bólikke qysqartý, sondai-aq aýyr jáne asa aýyr qylmystar úshin sottalǵandardyń jazasyn qysqartý usynylady», - dedi Quspan.
Abzal Quspannyń aitýynsha, zańdy qabyldaý qosymsha biýdjet shyǵyndaryn talap etpeidi jáne teris ekonomikalyq nemese áleýmettik saldarǵa ákelmeidi. Depýtat zań jobasynda adam, qoǵam jáne memleket múddeleriniń teńgerimi saqtalǵanyn aitty.
