Qazaqstanda memlekettik bilim berý uiymdarynyń basshylary men pedagogterin qyzmetke taǵaiyndaý jáne qyzmetten bosatý qaǵidalaryna ózgerister engizildi, dep habarlaidy dalanews.kz.
Qujat 2026 jylǵy 6 qyrkúiekten bastap kúshine enedi. Jańa talaptarǵa sáikes, mektep direktorynyń laýazymy bos nemese ýaqytsha bos bolǵan jaǵdaida aýdandyq ne qalalyq bilim bólimi bes jumys kúni ishinde oblystyq bilim basqarmasyna konkýrs ótkizý týraly resmi ótinish joldaýy tiis.
Konkýrs aiaqtalǵanǵa deiin direktordyń mindetin onyń orynbasary nemese sol bilim berý uiymynyń pedagogi atqarady. Bul merzim alty aidan aspaýy kerek. Eger konkýrs ótpei qalsa, mindet atqarý merzimi taǵy alty aiǵa uzartylýy múmkin.
Túzetýlerge sáikes, birqatar kandidattar mektep direktory laýazymyna úmitker bolǵan kezde sertifikattaýdan ótpeidi.
Olardyń qataryna:
- Prezidenttik jastar kadr rezerviniń músheleri;
- Nazarbaev ýniversitetiniń túlekteri;
- «Bolashaq» baǵdarlamasy boiynsha shetelde bilim alǵan azamattar;
- QS, Times Higher Education (THE) jáne ARWU reitingterindegi álemniń úzdik 100 ýniversitetiniń túlekteri kiredi.
Alaida mundai kandidattardyń pedagogikalyq nemese tiisti kásibi joǵary bilimi jáne pedagogikalyq qaita daiarlaýdan ótkenin rastaityn qujaty bolýy qajet. Al qalǵan úmitkerler normativtik-quqyqtyq aktilerdi bilý boiynsha sertifikattaýdan jáne memlekettik tildi meńgerý deńgeiin anyqtaityn testileýden ótedi. Konkýrsqa qatysý úshin KAZTEST nemese QAZAQ RESMI TEST júiesi boiynsha keminde V1 deńgeiindegi sertifikat talap etiledi. Sertifikattaý kezinde ár normativtik-quqyqtyq akt boiynsha durys jaýaptardyń eń tómengi kórsetkishi 50 paiyz bolyp belgilengen. Testileýge 96 minýt beriledi.
Konkýrs qorytyndysy boiynsha sheshimdi arnaiy komissiia qabyldaidy. Jeńimpaz eń kóp ball jinaǵan kandidat bolyp tanylady. Eger birneshe úmitkerdiń baly birdei bolsa, komissiia músheleri ashyq daýys berý arqyly sheshim shyǵarady. Daýystar teń túsken jaǵdaida komissiia tóraǵasynyń daýysy sheshýshi bolady. Sondai-aq konkýrs komissiiasy músheleriniń arasynda múddeler qaqtyǵysy anyqtalsa, komissiia quramy qaita qaralady.
Konkýrsqa qatysý úshin qujattar habarlandyrý jariialanǵannan keiingi kelesi jumys kúninen bastap jeti jumys kúni ishinde qabyldanady.
Úmitkerler qujattaryn:
- elektrondy formatta;
- qaǵaz túrinde;
- «Azamattarǵa arnalǵan úkimet» memlekettik korporatsiiasy arqyly;
- qyzmet kórsetýshi mekemeniń keńsesi arqyly;
- elektrondyq úkimet portaly arqyly tapsyra alady.
Jańa qaǵidalarda eńbek shartynyń merzimi aiaqtalǵannan keiin direktor mindetin ýaqytsha atqarý tártibi de naqtylanǵan. Bilim berý uiymynyń basshysy men basqarý organynyń kelisimi bolǵan jaǵdaida, ol konkýrs aiaqtalǵanǵa deiin ýaqytsha basshy bolyp qala alady. Biraq bul merzim alty aidan aspaýy tiis.
Belgilengen merzim aiaqtalǵan soń eńbek sharty toqtatylady. Al shartty buzý týraly habarlamanyń bolmaýy onyń avtomatty túrde uzartylýyna negiz bolmaidy.
Ózgerister ulttyq «Jaily mektep» jobasy aiasynda salynǵan bilim berý uiymdaryna kadr taǵaiyndaý tártibine de qatysty. Kadr rezervine engizilgen direktor orynbasarlary mundai mektepterdegi direktor nemese direktordyń orynbasary qyzmetterine basymdyqpen taǵaiyndalady. Al kadr rezervindegi pedagogter «Jaily mektepterdegi» direktor orynbasary laýazymdaryna ornalasý kezinde artyqshylyqqa ie bolady. Jańa túzetýler pedagogterdi konkýrstyq jáne konkýrstan tys negizde jumysqa qabyldaý tártibin de ózgertedi.
