Qazaqstanda talapkerlerdiń bilimin baǵalaýdyń jańa tásili ázirlenip jatyr. Ulttyq testileý ortalyǵy halyqaralyq ETS uiymymen birlesip Admission Insight Test (AIT) jobasyn júzege asyrýda. Jańa test pándik bilimmen qatar, syni oilaý, akademiialyq jazý jáne tsifrlyq saýattylyq daǵdylaryn baǵalaýdy kózdeidi, dep habarlaidy dalanews.kz.
Ulttyq testileý ortalyǵynyń direktory Nurseiit Baijanov UBT-nyń jańa formaty men oqýshylardyń bilimin baǵalaýdyń tásilderi týraly baiandama jasady. Bul týraly Bilim berý máseleleri jónindegi ǵylymi-zertteý ortalyǵynyń baspasóz qyzmeti habarlady.
15 qazanda Qazaq AI Research University ýniversitetinde Joǵary bilim berý qyzmetkerleri kúnine arnalǵan forým ótti. Is-sharaǵa Ǵylym jáne joǵary bilim ministrliginiń ókilderi men basshylyǵy, joǵary oqý oryndary jáne vedomstvoǵa qarasty uiymdardyń ókilderi qatysty. Forýmda Nurseiit Baijanov «UBT-nyń jańa formaty – oqýshylardyń bilimin baǵalaýdyń zamanaýi quraly» taqyrybynda baiandama jasady.
UBT-nyń jańa formaty qandai bolady?
Ulttyq testileý ortalyǵy halyqaralyq ETS uiymymen birlesip Admission Insight Test (AIT) jobasyn júzege asyryp jatyr. Joba 2026 jylǵy aqpanda bastalǵan. Ony 2030 jylǵa deiin iske asyrý josparlanǵan. Jobanyń maqsaty – bilim berý júiesindegi ózgerister men qazirgi talaptardy eskere otyryp, joǵary oqý oryndaryna túsý emtihandaryna qatysty tásilderdi qaita qaraý.
Usynylyp otyrǵan AIT testi eki bólimnen turady.
Birinshi bólimde 14 beiindik pán boiynsha test tapsyrmalary bolady. Olardy memlekettik standartqa sáikes jańartý josparlanǵan. Bul rette aqparatty jattap alyp, qaitalaýdan góri, taqyrypty túsiný men bilimdi qoldaný qabiletine kóbirek mán berilmek.
Ekinshi bólimde talapkerlerdiń túrli daǵdylary baǵalanady. Ol bes modýlden turady. Modýlder syni oilaý, akademiialyq jazý jáne zertteý daǵdylary, kommýnikatsiia, jasandy intellekt, sandyq jáne tsifrlyq saýattylyq, sondai-aq kreativti jáne dizaindyq oilaý qabiletterin baǵalaýǵa baǵyttalǵan. Sońǵy modýl áli ázirlenip jatyr. Ulttyq testileý ortalyǵynyń direktory pándik bilim emtihannyń negizgi bóligi bolyp qala beretinin atap ótti. Al daǵdylardy baǵalaý ony almastyrmaidy, kerisinshe tolyqtyrady.
Testileýdiń naqty qurylymy bilim berý saiasaty men zertteý nátijelerine qarai odan ári naqtylanbaq.
Jańa testini ázirleýge kimder qatysyp jatyr?
Jańa baǵalaý júiesin ázirleý barysynda ashyqtyqqa erekshe nazar aýdarylyp otyr. 2026 jylǵy sáýirde Ulttyq testileý ortalyǵy men ETS birlesip, shamamen 4 myń respondenttiń qatysýymen zertteý júrgizgen. Sonymen qatar Astanada segiz fokýs-top jáne tórt tereńdetilgen talqylaý uiymdastyrylǵan.
Jobaǵa joǵary oqý oryndary, oqytýshylar jáne bilim berý júiesiniń basqa da qatysýshylary tartylyp jatyr. Bul jańa qabyldaý júiesin ázirleý kezinde ártúrli taraptyń pikirin eskerýge múmkindik beredi.
AIT testi qashan ótkiziledi?
Jańa Admission Insight Test júiesin pilottyq rejimde synaqtan ótkizý 2027 jyldyń kóktemine josparlanǵan. Ázirge bul – ázirlenip jatqan joba. Testileýdiń túpkilikti qurylymy men ony engizý tártibi bilim berý saiasaty men zertteý nátijelerine sáikes naqtylanatyn bolady.
