Qazirgi ýaqytta investorlardy baǵaly qaǵazdar naryǵyna investitsiialaý kezinde yqtimal shyǵyndardan qorǵaý maqsatynda Qarjy naryǵyn retteý jáne damytý agenttigi kúrdeli qarjy quraldaryn satyp alý úshin zańnamalyq shekteýler belgiledi, dep jazady Dalanews.kz.
- Endi kúrdeli qarjy quraldaryn tek bilikti investorlarǵa satyp alýǵa ruqsat etiledi, - deidi QNRDA Baǵaly qaǵazdar naryǵy departamentiniń direktory Aidyn Dáýletbaq.
Onyń aitýynsha, jańa zańnamalyq túzetýlerge sáikes qarjy quraldarynyń tizbesine týyndy baǵaly qaǵazdar jáne/nemese ózge de týyndy qarjy quraldary, sondai-aq shyǵarý talaptarynda olardyń bólshek investorlarǵa arnalmaǵany kózdelgen qarjy quraldary kiredi. Bul shekteýler sonyń ishinde jahandyq depozitarlyq qolhattardy (GDR/ADR) qamtidy.
"Depozitarlyq qolhat – bul kastodian bankte nemese depozitarlyq uiymda saqtalatyn sheteldik aktsiialardyń belgili bir sanyna ielik etý quqyǵyn kýálandyratyn týyndy baǵaly qaǵaz. Sonymen qatar, depozitarlyq qolhattar aktsionerlerdiń jalpy jinalysynda daýys berý quqyqtary, dividendter alý jáne olarǵa salyq salý, sondai-aq olarǵa qatysty qoldanylatyn zańnama boiynsha bazalyq aktivten keibir aiyrmashylyqtarǵa ie bolýy múmkin", - deidi ol.
Osylaisha, depozitarlyq qolhattar investitsiialaýǵa bailanysty táýekelderdi tolyq túsiný úshin bólshek investorlardan belgili bir bilimniń bolýyn talap etetin kúrdeli qarjy quraldary.
Bul rette Qarjy quraldarynyń tizbesine engizilgen túzetýler bólshek investorlardyń Depozitarlyq qolhattardy satyp alýyna tyiym salýdy kózdemeidi. Olar bilikti investor mártebesin alý arqyly atalǵan qarjy quraldaryn satyp ala alady.
Bilikti investor mártebesin broker taǵaiyndaidy. Bilikti investor mártebesin alý úshin jeke tulǵa mynadai talaptardyń birine nemese birnesheýine sáikes kelýi tiis:
- qarjy jáne ekonomika salasynda joǵary biliminiń, CFA, FRMC, CIIA sertifikattarynyń bolýy,
- investitsiialar salasynda eńbek ótili bolýy
- keminde 8 500 AEK (shamamen 30 mln teńge) mólsherinde aktivteriniń bolýy
- qarjy quraldarymen saýda boiynsha tájiribesi bolýy kerek (sońǵy 12 aida keminde 50 mámile).
Eger investor kórsetilgen talaptarǵa sáikes kelmegen jaǵdaida, ol testileýden ótkennen keiin qarjy quraldarynyń barlyq tizbesine qatysty da, qarjy quraldarynyń jekelegen túrleri boiynsha da bilikti dep tanylýy múmkin. Bul rette testileý sheńberinde broker investordyń qandai da bir qarjy quralymen bailanysty táýekelderdi qanshalyqty túsinetinin tekserýi tiis.
Eger investor durys jaýaptardyń qajetti sanyn jinamasa, onda ol brokerdiń investitsiialaý táýekelderi týraly habarlamasymen tanysyp, qol qoiǵannan keiin ǵana kúrdeli qarjy quraldaryn satyp ala alady.
Bilikti investor mártebesin alý úshin osy sharttar zańdy tulǵalarǵa qatysty qoldanylmaidy.
"Osylaisha, bul ózgerister bilikti emes investorlardyń quqyqtary men múddelerin qorǵaýǵa, sondai-aq áleýetti investorlardy qosa alǵanda, halyqtyń qarjylyq saýattylyǵyn arttyrýǵa baǵyttalǵan".
