Qazaqstanda jańa kólikter arzandai bastady. Ulttyq statistika biýrosynyń málimetinshe, bir jyl ishinde avtosalondardaǵy kólik baǵasy shamamen 18 paiyzǵa tómendegen, dep habarlaidy dalanews.kz "Jetinshi arnaǵa" siltep.
Naryqtaǵy ózgeriske eń aldymen qytailyq brendterdiń yqpaly baiqalyp otyr. Avtosalon ókilderiniń aitýynsha, byltyr Almatyda jańa zaýyt iske qosylǵannan keiin keibir modelderdiń baǵasy 7-15 paiyzǵa arzandaǵan.
Qazir Changan, Chery, Haval jáne Tank siiaqty markalar suranysqa ie. Olardyń baǵasy salystyrmaly túrde qoljetimdi ári tehnikalyq jabdyqtalýy da jaqsy.
Mysaly, Changan jáne Chery kólikteriniń baǵasy shamamen 7 million teńgeden bastalsa, Haval modelderi odan 1-1,5 million teńgege qymbat. Sonymen qatar, keibir avtosalondar Geely men Jetour brendterine 1,3-2 million teńgege deiin jeńildik usynyp otyr.
Sarapshylardyń pikirinshe, baǵa tómendeýine qytailyq kólikterdiń Qazaqstanda qurastyrylýy da áser etken. Buryn bul brendter syrttan ákelinse, qazir óndiristiń bir bóligi el ishinde júzege asyrylyp jatyr. Bul logistika men basqa da shyǵyndardy azaitýǵa múmkindik bergen.
Qazaqstan avtomobil odaǵynyń dereginshe, keiingi bes jylda qytailyq kólikterdiń naryqtaǵy úlesi aitarlyqtai ósken. 2020 jyly olardyń úlesi nebári 2 paiyz bolsa, qazir bul kórsetkish 39 paiyzǵa jetken. Iaǵni elimizde satylatyn árbir úshinshi kólik - qytailyq brend.
Soǵan qaramastan, byltyr eń kóp satylǵan modelder qatarynda Chevrolet Cobalt, Hyundai Tucson jáne Kia Sportage kósh bastaǵan. Al Changan men Chery alǵashqy ondyqtyń sońǵy bóliginde ornalasqan.
Mamandardyń aitýynsha, qytailyq brendterdiń kóbeiýi naryqtaǵy básekeni kúsheitken. Sonyń nátijesinde óndirýshiler men dilerler satyp alýshylardy tartý úshin túrli jeńildikter men tiimdi baǵdarlamalar usyna bastaǵan.
Derekke súiensek, byltyr Qazaqstanda 235 myń jańa kólik satylsa, biylǵy tórt aidyń ózinde avtosalondarda 65 myńnan asa kólik satylǵan. Sarapshylar aldaǵy ýaqytta da baǵa úshin báseke kúsheiip, naryqtaǵy usynystar kóbeietinin boljap otyr.
