Qazaqstanda óz reiting agenttigin qurý josparlanyp otyr. Bul bastama bizneske nesieni tiimdi sharttarmen alýǵa múmkindik beredi, dep habarlaidy Dalanews.kz.
Bul týraly Májilis otyrysynda Qarjy naryǵyn retteý jáne damytý agenttigi tóraiymy Madina Ábilqasymova málimdedi.
Onyń aitýynsha, qazirgi tańda elde kompaniialarǵa reitingti negizinen Standard & Poor’s, Moody’s, Fitch siiaqty halyqaralyq uiymdar beredi. Al Qazaqstanda ulttyq reiting júiesi men tolyqqandy quqyqtyq baza áli qalyptaspaǵan. Sondyqtan reitingter kóbine iri kompaniialar men qarjy uiymdaryna ǵana beriledi.
Madina Ábilqasymova jańa júie shaǵyn jáne orta bizneske kapital naryǵyna shyǵýdy jeńildetetinin atap ótti. Bul qaryz alý qunyn tómendetip, aqparattyq teńsizdikti azaityp, emitentterdiń ashyqtyǵyn arttyrýǵa múmkindik beredi. Sonymen qatar bankter, zeinetaqy qorlary men saqtandyrý uiymdary siiaqty institýtsionaldyq investorlar úshin investitsiialaý múmkindigi keńeiedi.
Jańa agenttik quramyna Qazaqstan Ulttyq banki, halyqaralyq reiting agenttikteri jáne qarjy uiymdary kiredi. Ulttyq banktiń qatysýy baǵalaýdyń turaqtylyǵy men senimdiligin qamtamasyz etý úshin qajet.
Agenttikke qoiylatyn talaptar da naqty belgilenedi. Atap aitqanda, jarǵylyq kapital shamamen 10 mlrd teńge deńgeiinde bolady dep kútilýde.
Reitingterdiń táýelsizdigin saqtaý úshin sarapshylarǵa qoiylatyn talaptar kúsheitiledi. Olardyń eńbekaqysy klientterdiń tabysyna táýeldi bolmaýy tiis, mindetti rotatsiia engiziledi jáne affilirlenýge shekteýler qoiylady. Sonymen qatar reitingteletin kompaniialardyń qarjy quraldaryna ielik etýge tyiym salynady.
Basshylyq quramyna da qatań talaptar qoiylady: tiisti bilim, tájiribe jáne minsiz iskerlik bedel qajet.
Qazaqstandyq reiting agenttigi retteýshige turaqty túrde esep berip otyrýǵa mindetteledi. Ol óz reitingteri, ádistemeleri men statistikasy týraly aqparatty ashyq jariialap, ishki baqylaý jáne táýekelderdi basqarý júiesin engizýi tiis.
Sonymen qatar jańa agenttik tek baǵalaý júrgizip qana qoimai, qadaǵalaý fýnktsiiasyn da atqarady. Ol Qazaqstan naryǵyna qandai halyqaralyq reiting agenttikteri jiberiletinin anyqtap, olardyń qyzmetin baqylap, qajet bolǵan jaǵdaida litsenziiasynan aiyra alady.
