Antikor Kólik ministrligimen birlesip jemqorlyq táýekelderine qatysty júrgizgen syrtqy taldaý nátijelerin jariialady. Ondaǵy tsifrlar kóńil kónshitpeidi. Oǵan sońǵy 5 jylda jol salasyna 6 trln teńgeden astam qarajat jumsalǵanyna qaramastan halyq tarapynan túsetin shaǵymdar qatary siremei turýy dálel, dep habarlaidy Dalanews.kz.
"2023-2024 jyldary memlekettik organdarǵa avtomobil joldarynyń sapasyzdyǵyna qatysty 20 myńnan astam shaǵym tústi. Bul arada basty sebep retinde jemqorlyq atalady. 2024 jyldyń basynan beri ǵana agenttik osy salada 24 qylmystyq isti tirkedi. Syrtqy taldaý josparlaýdan bastap baqylaý men kútip ustaýǵa deiingi jol qurylysy men jóndeýdiń barlyq kezeńderinde júieli jemqorlyq táýekelderiniń bar ekendigin kórsetti", delingen 29 qazanda jariialanǵan Antikor habarlamasynda.
Anyqtalǵan buzýshylyqtar men shemalar mynandai:
- bastapqy kezeńde problemalyq ýchaskeler durys anyqtalmaidy, jaqynda salynǵan joldarǵa jóndeý jumystary júrgiziledi;
- jobalaý kezinde smeta shamadan tys jumys pen materialdardyń esebinen jasandy túrde joǵarylatylady;
- kelisimsharttar kóbinese tájiribesi men resýrstary joq merdigerlermen, bir kózden nemese karteldik kelisim sharttarymen jasalady;
- qosalqy merdigerlik uiymdardy tartý eshkimniń baqylaýynda emes. Ol óziniń jetkiliksizdigin jáne kóp satyly baqylaý júiesin kórsetti;
- jol aktivteriniń ulttyq sapa ortalyǵynyń anyqtalǵan aqaýlar týraly qorytyndylaryn oryndaý mindetti emes, al tehnikalyq qadaǵalaý óz fýnktsiialaryn resmi túrde oryndaidy;
- salany damytý úshin Qazaqstandyq jol ǵylymi-zertteý institýtynyń áleýeti tolyq kólemde paidalanylmaidy. Qoldanbaly ǵylymi zertteýler men innovatsiialardy engizýdiń ornyna institýt normativtik qujattamany ázirleýmen ainalysady.
"Jańa tehnologiialardy engizýdi baqylaýdyń bolmaýy, bilikti kadrlardyń jetispeýshiligi jáne kúrdeli normativtik-quqyqtyq baza da avtojoldardyń sapasyna áser etedi. Tsifrlandyrýdyń jetkiliksizdigi problemany ýshyqtyrady. Sońǵy 10 jylda aqparattyq júielerdi damytýǵa 16 mlrd biýdjet qarajaty jumsaldy. Degenmen, joldardyń tsifrlyq kartasy áli ázirlenbegen", delingen taldaý qorytyndysynda.
Taldaý qorytyndysy boiynsha agenttik osy saladaǵy jemqorlyq táýekelderin joiý boiynsha 90-nan astam usynys daiyndady.
Jobalar saraptamasynyń jáne tehnikalyq qadaǵalaý institýtynyń fýnktsionalyn qaita qaraý, QazjolǴZI-ǵa suranysqa ie innovatsiialyq tehnologiialardy ázirleýge qaita baǵdarlaý, iri jol jobalaryn ǵylymi-tehnikalyq súiemeldeý, jol aktivteri sapasynyń ulttyq ortalyǵynyń ókilettikterin kúsheitý, sondai-aq joldardyń tsifrlyq kartasyn jasaý jóninde sharalar usynyldy. Birqatar usynystar qazirdiń ózinde synalýda.
Mysaly, Atyraý oblysynda avtojoldardyń birin ortasha jóndeý kezinde "Tsifrlyq teńge" jobasy arqyly bólingen aqshalai qarajatty qadaǵalaý josparlanýda.
