Jyl basynan beri Qazaqstanda shamamen 25 adam prank úshin jaýapkershilikke tartyldy, dep habarlaidy Dalanews.kz.
"Keiingi ýaqytta internette prank dep atalatyn beinerolikter men túrli ekstremaldy kórinister jii taralyp jatyr. Bul ázilsymaq áreketter men qaýipti triýkter áleýmettik jelilerdegi haip úshin jasalady. Ókinishke qarai, “laik” pen qaralym qýǵan mundai áreketter jii ázil sheginen asyp, oiyn-saýyqtan alys ketip jatady. Avtorlar jyly shyraily kontenttiń ornyna agressiia, arandatý, zorlyq-zombylyq kórinisterin instsenirovka jasaýǵa, tipti óz ómiri men ainalasyndaǵylardyń ómirine qaýip tóndirýge deiin barady. Mundai áreketter qoǵamdyq tártipke qater tóndiredi jáne quqyq buzýshylyq bolyp sanalady. Jyl basynan beri osyndai faktiler boiynsha 24 adam ákimshilik jaýapkershilikke tartyldy", – dedi IIM resmi ókili, departament basshysy Shyńǵys Álekeshev.
Ministrliktiń málimetinshe, elordada blogerler lift ishinde “máiit” jáne balta ustaǵan adammen jasandy shabýyl uiymdastyrǵan. Bul videorolik kezdeisoq adamdardyń úreiin týdyrǵan. Prankke qatysqan barlyq adam 15-ten 30 táýlikke deiin ákimshilik qamaýǵa alyndy.
Sondai-aq Almaty oblysynda ekstremaldy beinerolik túsirý kezinde bir jas jigit kele jatqan kóliktiń ústinen sekirmek bolǵan. Alaida bul áreket qaiǵyly jaǵdaimen aiaqtaldy. Ol aýyr jaraqat alyp, kóz jumdy.
"Zańdy saqtańyzdar jáne quqyqtyq jaýapkershilikke ákelýi múmkin áreketterge barmańyzdar", – dep eskertti Shyńǵys Álekeshev.
