Senator Nurlan Beknazarov azamattardyń jekelegen sanattarynyń sailaý men referendýmdarǵa qatysýyn shekteýdi usyndy. Bul bastamany ol Konstitýtsiialyq reforma jónindegi komissiianyń ekinshi otyrysynda kóterdi, dep habarlaidy Dalanews.kz.
Senatordyń aitýynsha, sot sheshimimen áreketke qabiletsiz dep tanylǵan azamattar, sondai-aq bas bostandyǵynan aiyrý oryndarynda jazasyn ótep jatqan adamdar sailaý men referendýmdarǵa qatyspaýy tiis.
Sonymen qatar Beknazarov memlekettik laýazymdarǵa sailaný quqyǵyna da shekteý engizýdi usyndy. Atap aitqanda, bul shekteý sottylyǵy alynbaǵan nemese ótelmegen azamattarǵa, sondai-aq sot sheshimimen sybailas jemqorlyq qylmys jasaǵany dáleldengen tulǵalarǵa qatysty bolmaq.
«Mundai norma qoǵam suranysyna tolyq jaýap beredi jáne memlekettik qyzmetke úmitkerlerge qoiylatyn talaptardy kúsheitýge múmkindik beredi», - dedi senator.
Onyń túsindirýinshe, usynylyp otyrǵan ózgerister sailaý úderisterine jáne bilik institýttaryna degen qoǵamdyq senimdi nyǵaitýǵa, sondai-aq memleketti basqarýǵa úmitker azamattar úshin joǵary standarttar qalyptastyrýǵa baǵyttalǵan.
