Qazaqstanda jasandy intellekt tehnologiialary ekonomikanyń túrli salalaryna engizilip jatyr, dep habarlaidy Dala News.
Bul týraly Úkimet otyrysynda Ersaiyn Naǵaspaev málimdedi.
Onyń aitýynsha, qurylys salasynda jasandy intellekt jobalaýdan bastap qurylys barysyn baqylaýǵa deiin barlyq kezeńde qoldanylyp jatyr. Qala qurylysy men josparlaý kezinde «kompiýterlik kórý» tehnologiiasy pilottyq rejimde engizilgen. Júie nysandardyń naqty jaǵdaiyn jobalyq qujattarmen salystyryp, sáikessizdikterdi anyqtaidy.
Nátijesinde tekserý ýaqyty 3 jumys kúninen 4 saǵatqa deiin qysqarǵan. Bul zańsyz qurylys táýekelderin azaitýǵa múmkindik beredi.
Sonymen qatar qalalardyń tsifrlyq kóshirmelerin jasaý úshin drondardy paidalaný jumystary júrgizilýde. Jobalaý jáne memlekettik saraptama kezeńinde BIM jobalaryn tekserý úshin jasandy intellekt engizý josparlanǵan. Ol úshin qurylys normalary mashina oqi alatyn formatqa kóshirilýde.
«Bul túrli óńirlerde tiptik jobalardy qaraý merzimindegi aiyrmashylyqtardy joiady jáne memlekettik saraptamanyń biryńǵai ári ashyq erejelerin qamtamasyz etedi», – dedi ministr.
Sondai-aq BIM júiesin kezeń-kezeńimen mindetti standart retinde engizý kózdelip otyr. Alǵashqy kezeńde bul talap ónerkásiptik qurylysqa qatysty bolady.
Ministrdiń aitýynsha, ónerkásip salasynda jasandy intellekt sapany baqylaý jáne óndiristik protsesterdi ońtailandyrý úshin qoldanylady. Taý-ken óndirisinde de JI negizindegi sheshimder engizilýde.
