قازاقستاندا جاساندى ينتەللەكت تەحنولوگيالارى ەكونوميكانىڭ ءتۇرلى سالالارىنا ەنگىزىلىپ جاتىر، دەپ حابارلايدى Dala News.
بۇل تۋرالى ۇكىمەت وتىرىسىندا ەرسايىن ناعاسپايەۆ مالىمدەدى.
ونىڭ ايتۋىنشا، قۇرىلىس سالاسىندا جاساندى ينتەللەكت جوبالاۋدان باستاپ قۇرىلىس بارىسىن باقىلاۋعا دەيىن بارلىق كەزەڭدە قولدانىلىپ جاتىر. قالا قۇرىلىسى مەن جوسپارلاۋ كەزىندە «كومپيۋتەرلىك كورۋ» تەحنولوگياسى پيلوتتىق رەجيمدە ەنگىزىلگەن. جۇيە نىسانداردىڭ ناقتى جاعدايىن جوبالىق قۇجاتتارمەن سالىستىرىپ، سايكەسسىزدىكتەردى انىقتايدى.
ناتيجەسىندە تەكسەرۋ ۋاقىتى 3 جۇمىس كۇنىنەن 4 ساعاتقا دەيىن قىسقارعان. بۇل زاڭسىز قۇرىلىس تاۋەكەلدەرىن ازايتۋعا مۇمكىندىك بەرەدى.
سونىمەن قاتار قالالاردىڭ سيفرلىق كوشىرمەلەرىن جاساۋ ءۇشىن درونداردى پايدالانۋ جۇمىستارى جۇرگىزىلۋدە. جوبالاۋ جانە مەملەكەتتىك ساراپتاما كەزەڭىندە BIM جوبالارىن تەكسەرۋ ءۇشىن جاساندى ينتەللەكت ەنگىزۋ جوسپارلانعان. ول ءۇشىن قۇرىلىس نورمالارى ماشينا وقي الاتىن فورماتقا كوشىرىلۋدە.
«بۇل ءتۇرلى وڭىرلەردە تيپتىك جوبالاردى قاراۋ مەرزىمىندەگى ايىرماشىلىقتاردى جويادى جانە مەملەكەتتىك ساراپتامانىڭ ءبىرىڭعاي ءارى اشىق ەرەجەلەرىن قامتاماسىز ەتەدى»، – دەدى مينيستر.
سونداي-اق BIM جۇيەسىن كەزەڭ-كەزەڭىمەن مىندەتتى ستاندارت رەتىندە ەنگىزۋ كوزدەلىپ وتىر. العاشقى كەزەڭدە بۇل تالاپ ونەركاسىپتىك قۇرىلىسقا قاتىستى بولادى.
ءمينيستردىڭ ايتۋىنشا، ونەركاسىپ سالاسىندا جاساندى ينتەللەكت ساپانى باقىلاۋ جانە وندىرىستىك پروسەستەردى وڭتايلاندىرۋ ءۇشىن قولدانىلادى. تاۋ-كەن وندىرىسىندە دە جي نەگىزىندەگى شەشىمدەر ەنگىزىلۋدە.
