Osyndai iri ónerkásip nysanynyń qurylysy Memleket basshysy Qasym-Jomart Toqaevtyń Ońtústik Koreia kompaniiasynyń basshylyǵymen ýaǵdalastyqtary nátijesinde bastalyp otyr. Eske sala keteiik, osy jyldyń qańtar aiynda Prezident Qostanaida Kia avtomobilderiniń shaǵyn toraptyq óndirisin iske qosý rásimine qatysa otyryp, ónerkásip kooperatsiiasyn odan ári keńeitý jáne injenerlik bazany qalyptastyrýdyń mańyzyn atap ótken bolatyn.
Joǵary jalaqy tólenetin 1 500 jumys ornyn qurýǵa múmkindik beretin jańa zaýyttyń óndiristik qýaty jylyna 70 myń avtokólik bolmaq. Jobaǵa shamamen $250 mln tikelei sheteldik investitsiialar salynatyn bolady.
Roman Skliar óz sózinde Kia kompaniiasy alǵash ret Koreia Respýblikasynan tys jerde birlesken kásiporyn men zaýyt salýǵa tikelei investitsiia salyp otyrǵanyn atap ótti.
«Qostanaida KIA avtomobilderin shyǵaratyn tolyq tsikldi zaýyt salýdy mashina jasaý salasy úshin shyn máninde serpindi joǵary tehnologiialyq joba dep ataýǵa bolady. Bul joba naqty mýltiplikativti áser beredi, injenerlik jáne tehnikalyq kadrlardyń jańa býynyn daiarlaý deńgeiin arttyrýǵa, sondai-aq lokalizatsiialaýdyń kelesi kezeńine kóshýdi aitarlyqtai jedeldetýge múmkindik beredi», — dedi Roman Skliar.
Premer-Ministrdiń birinshi orynbasarynyń aitýynsha, osyndai negizgi investory bar zaýyttyń paida bolýy otandyq ónerkásipti damytýdyń mańyzdy kezeńi, ekonomikanyń barlyq salalarynda Ońtústik Koreiamen bolashaq birlesken investitsiialyq jobalar úshin aiqyn úlgi bolady.
Qurylys jumystary 2024 jyly aiaqtalady dep kútilýde, sodan keiin jabdyqtar ornatyla bastaidy. 2025 jyldyń birinshi toqsanynda zaýyt pilottyq rejimde iske qosylmaq, al ekinshi toqsanynda óndiristiń tolyq tsikli ashylady.
«Búginde Kia úshin Qazaqstan Respýblikasynyń ekonomikasyn damytýǵa úles qosý múmkindigine ie bolý – úlken qurmet pen maqtanysh. Qostanaidaǵy jańa zaýyt azamattar, ýniversitet túlekteri men injenerlerge joǵary deńgeidegi tájiribe jinaýǵa múmkindik beretin biregei jumys oryndaryn usyna otyryp, mańyzdy ról atqaratynyna senimdimin», — dedi Kia Corporation prezidenti jáne bas direktory Ho Sýn Son beinehabarlamasynda.
Ońtústik Koreia kompaniiasy avtomobil jasaýdaǵy jergilikti qamtý deńgeiin arttyrý boiynsha Qazaqstannyń ónerkásiptik saiasatyna tolyq qoldaý kórsetýge daiyn ekenin bildirdi. Kia Qostanaida lokalizatsiialaý ortalyǵyn ashý boiynsha belsendi túrde jumys júrgizip jatyr. Munda shaǵyn jáne orta biznestiń qatysýymen quramdas bólikter óndirisi júrgizilmek.
Oblys ákimi Qumar Aqsaqalov ozyq álemdik tájiribelerge júgine otyryp, zamanaýi joǵary tehnologiialyq kásiporyndy iske qosý respýblikanyń avtomobil jasaýdaǵy óndiris kólemin ulǵaitýǵa yqpal etetinine senimdi.
«Mashina jasaý salasyn damytý óńirdiń damýyna mýltiplikativtik turǵydan áser etedi. Atap aitqanda, mashina jasaý salasynda bir jumys ornyn qurý basqa salalarda bes-alty jumys ornynyń qurylýyna septigin tigizedi. Óndiristerdi lokalizatsiialaý deńgeiin arttyrý úshin jańa zaýyttyń ainalasynda quramdas bólshekter jetkizýshileri retinde shaǵyn jáne orta biznes beldeýi qurylady», — dedi Qumar Aqsaqalov.
Koreia Respýblikasynyń Qazaqstandaǵy elshisi Te-ik Chjo 30 jyldan astam ýaqyt boiy Qazaqstan men Ońtústik Koreia ózara tiimdi áriptestikti nyǵaityp kele jatqanyn atap ótti.
«Búginde elderimiz QR Prezidenti Qasym-Jomart Toqaevtyń Qazaqstan halqyna Joldaýynda aitylǵan ekonomikalyq reformalardyń maqsattaryna sáikes keletin ekonomikalyq yntymaqtastyqty is júzinde belsendi túrde damytýda. Bul reformalar óńdeý salasyn damytý arqyly respýblika ónerkásibin ártaraptandyrýǵa baǵyttalǵan», — dedi ol.
