Qazaqstanda 2026 jyldyń birinshi jartyjyldyǵynda ishki taýar ainalymynyń kólemi 36,2 trln teńgeni qurap, ótken jyldyń sáikes kezeńimen salystyrǵanda 15,3%-ǵa ósti, dep habarlaidy Dala News.
Úkimet otyrysynda saýda jáne integratsiia ministri Arman Shaqqalievtiń aitýynsha, ósimniń negizgi bóligi azyq-túlik saýdasy esebinen qamtamasyz etilgen. Bul segmenttiń ósimi shamamen 30%-dy quraǵan.
Ministrdiń málimetinshe, qańtar–mamyr ailary aralyǵynda azyq-túlik eksporty 34,4%-ǵa ósip, 1,6 mlrd AQSh dollaryna jetken. Sonymen qatar importqa táýeldilik 14,7%-ǵa deiin tómendegen.
Onyń aitýynsha, Qazaqstan kúnbaǵys maiy, un, kúrish, kartop, piiaz, sábiz, makaron ónimderi, siyr jáne qoi eti boiynsha ishki suranysty tolyq qamtamasyz etip otyr.
Azyq-túlikke jatpaityn sektorda da oń dinamika baiqalǵan. Bes aidyń qorytyndysy boiynsha shikizattyq emes taýarlar eksporty 12%-ǵa ósip, 10 mlrd AQSh dollarynan asqan. Al import kólemi 4,4%-ǵa artqan.
Ministrlik málimetinshe, otandyq ónimniń saýda jelilerindegi úlesin arttyrýǵa baǵyttalǵan zańnamalyq ózgerister ázirlengen. Olarǵa sáikes azyq-túlik taýarlary úshin sóre keńistiginiń keminde 50%-yn, al azyq-túlikke jatpaityn taýarlar úshin keminde 30%-yn qazaqstandyq ónimderge berý kózdelgen.
Sonymen qatar jyl sońyna deiin otandyq óndirýshilerdi saýda jelilerimen tikelei bailanystyratyn QazTrade Retail tsifrlyq platformasyn iske qosý josparlanyp otyr.
Ministrdiń aitýynsha, elde jyl saiyn 10 myńnan astam aýyl sharýashylyǵy jármeńkesi ótkiziledi. Biylǵy jyldyń basynan beri 4,6 myń jármeńke uiymdastyrylǵan. Bul jármeńkelerde qazaqstandyq óndirýshilerge saýda oryndary tegin usynylady.
Sondai-aq memlekettik baqylaý kúsheitilgen. Jyl basynan beri shekarada shamamen 13 myń avtokólik tekserilip, 13 myń ónim úlgisi zerttelgen. Nátijesinde 1,8 myń ónimniń talaptarǵa sáikes kelmeitini anyqtalyp, 1,1 myńnan astam sáikestik sertifikatynyń kúshi joiylǵan.
Bes aidyń qorytyndysy boiynsha shikizattyq emes eksport 14,5%-ǵa ósip, 11,8 mlrd AQSh dollaryna jetken. Al eksportty saqtandyrý kólemi birinshi jartyjyldyqta 400 mlrd teńgeden asyp, jyl sońyna deiin 1,2 trln teńgege deiin ulǵaitylady dep josparlanyp otyr.
