"QazMunaiGaz" ben LanzaJet Qazaqstanda turaqty aviatsiialyq otyn óndiretin (SAF) zaýyt salý boiynsha tehnikalyq-ekonomikalyq negizdemeni (TEN) bekitti,dep habarlaidy Dalanews.kz.
"Niý-Iork qalasynda "QazMunaiGaz" UK AQ (QMG) Basqarma tóraǵasy Ashat Hasenov amerikalyq LanzaJet tehnologiialyq kompaniianyń basshylyǵymen — bas atqarýshy direktory Djimmi Samartsispen jáne kommertsiialyq máseleler jónindegi vitse-prezidenti Stefan Tionmen kezdesti. Taraptar Qazaqstanda turaqty aviatsiialyq otyn óndiretin (SAF) zaýyt salý boiynsha aiaqtalǵan tehnikalyq-ekonomikalyq negizdemeniń (TEN) nátijelerin jáne aldaǵy is-sharalardy qarastyrdy", delingen kompaniia baspasóz qyzmetiniń habarlamasynda.
Kezdesý qorytyndysy boiynsha QMG men LanzaJet arasynda Negizdemelik kelisimge qol qoiyldy. Qujat TEN nátijelerin resmi túrde bekitti. Endi jańa kezeń — naqty jobalaý (FEED) bastalady. Bul kezeń aiasynda zaýyt qurylysy úshin barlyq tehnikalyq jáne ekonomikalyq sheshimder ázirlenedi. Budan buryn naryqqa júrgizilgen taldaý kórsetkendei, 2030 jylǵa qarai Qazaqstanda SAF tutyný kólemi jylyna 70 myń tonnaǵa jetýi múmkin.
"Birlesken jumys ekijaqty yntymaqtastyqty nyǵaitýǵa eleýli úles qosyp, tómen kómirtekti damý maqsattaryna jetýde jáne jańa tehnologiialardy engizýge yqpal etetin bolady. Jalpy, bul joba biologiialyq otyn naryǵynyń damýyna, aviatsiianyń ekologiialyq parametrlerin jáne elimizdiń tranzittik áleýetin jaqsartýǵa oń áserin tigizbek", — dep atap ótti Ashat Hasenov.
Aita ketsek, SAF (Sustainable Aviation Fuel) — munaimen bailanysty emes jańartylatyn resýrstardan óndiriletin ekologiialyq taza aviaotyn. Ony dástúrli Jet A-1 aviakerosininge qosyp paidalaný nátijesinde parnik gazdarynyń shyǵaryndysyn 95% deiin azaitýǵa múmkindik beredi.
Búgingi tańda Memleket basshysy Qasym-Jomart Toqaevtyń Niý-Iorkte jumys saparymen júrgeni belgili. Prezident BUU Bas Assambleiasynyń 80-shi sessiiasyna qatysyp, birqatar memlekettiń jáne halyqaralyq uiymdardyń basshylarymen kelissóz júrgizedi. Qasym-Jomart Toqaev Niý-Iorkke jumys sapary aiasynda Goldman Sachs Global Institute kompaniiasynyń jahandyq máseleler boiynsha prezidenti Djared Koenmen kezdesip, Qazaqstan jasandy intellekt, qarjy ekojúiesin tsifrlandyrý salalaryndaǵy yntymaqtastyqqa qyzyǵýshylyq tanytatynyn aitty.
