Qazaqstanda tsifrlyq aktivter naryǵyn retteý júiesi keńeiip, litsenziialanǵan provaiderler men jańa qarjy quraldary paida boldy, dep habarlaidy dalanews.kz.
Ulttyq bank tóraǵasy Timýr Súleimenovtiń málimetinshe, 2025 jyldyń qorytyndysynda AHQO provaiderleriniń operatsiialar kólemi $10,6 mlrd-qa jetken. Klientter sany shamamen 215 myń adamdy qurady.
2025 jylǵy shildede Ulttyq bank tsifrlyq aktivter salasyndaǵy jańa ónimder men biznes-modelderdi synaýǵa arnalǵan «retteýshi synaq alańyn» iske qosty. Qazir onda 14 baǵyt boiynsha 34 joba júzege asyrylyp jatyr. Olardyń qatarynda steiblkoinder, tokendeý, kriptobirjalar, kastodiandyq jáne kriptofiattyq servister bar.
2026 jylǵy 1 mamyrdan bastap tsifrlyq aktivter naryǵyn jalpyulttyq deńgeide retteitin jańa model kúshine endi. Zańnamada tsifrlyq qarjy aktivteri, steiblkoinder, tokendelgen naqty aktivter men qarjy quraldarynyń mártebesi aiqyndaldy.
Qazir qamtamasyz etilmegen tsifrlyq aktivterdi aiyrbastaityn úsh litsenziialanǵan operator jumys isteidi. Alǵashqy eki aida olardyń ainalymy shamamen 2 mlrd teńgeni quraǵan. Taǵy bes kompaniia litsenziia alý rásiminen ótip jatyr.
KASE tsifrlyq platformasynda bitkoin fiýchersine arnalǵan ETF boiynsha 20,5 mlrd teńgege 34 myń operatsiia jasalǵan. Úsh kriptoaktivke arnalǵan jańa ETF boiynsha 1 mlrd teńgege 650 operatsiia júrgizilgen.
Sonymen qatar kriptokarta, kripto-QR jáne kriptoekvairing siiaqty servister jumys istep tur. Ortalyq depozitarii tsifrlyq aktivter ieleriniń biryńǵai tizilimin júrgizip, ulttyq kastodiandyq infraqurylymdy qalyptastyrýda.
Ulttyq bank dereginshe, búginde tsifrlyq aktivter naryǵynyń jahandyq aýditoriiasy shamamen 750 mln adamdy quraidy, al onyń kapitaldanýy $2,3 trln-ǵa jetken. 2025 jyly steiblkoinder ainalymy $50 trln boldy. Sońǵy úsh jylda tokendelgen aktivter naryǵy 12 ese ósken.
