Túrkistan oblysy Saýran aýdanynda ornalasqan Sert aýylynda keiingi 5 jyldan beri birde-bir qylmys tirkelmegen, dep habarlaidy Dalanews.kz.
Bul - turǵyndardyń aýyzbirshiligi, ózara qurmeti jáne joǵary azamattyq jaýapkershiliginiń nátijesi. Aýylda 900-ge jýyq adam turady. Munda quqyqbuzýshylyqtyń aldyn alý, otbasy qundylyqtaryn nyǵaitý jáne jas urpaqty tárbieleý máselesine erekshe kóńil bólinedi. Ýchaskelik politsiia inspektory turǵyndarmen tyǵyz bailanysta jumys istep, turaqty túrde profilaktikalyq is-sharalar ótkizedi.
"Ashyq dialog pen senim qoǵamdyq tártip saqtalýyna negiz bolyp otyr. Sert turǵyndary eńbekke, sportqa, ulttyq dástúrdi dáripteýge basymdyq beredi. Jastar úlkenderden ónege alyp, syilastyq pen jaýapkershilikke negizdelgen ortada ósip keledi. Ishimdikten bas tartqan Sert aýyly - birlik pen ortaq jaýapkershilik qaýipsiz ári berekeli qoǵam qalyptastyra alatynyn dáleldegen aýyl", - dep jazylǵan habarlamada.
