Qazaqstanda bala asyrap alýǵa qoiylatyn talaptar qatańdatylatyn boldy. Bul ózgerister balalardyń qaýipsizdigin qamtamasyz etý úshin jáne asyrap alýshy otbasylardyń jaýapkershiligin arttyrý maqsatynda engizilmek, dep habarlaidy Dalanews.kz.
Senator Nuriia Niiazovanyń deregi boiynsha, 2024 jyldyń 11 aiynda kámeletke tolmaǵandarǵa qatysty 890 jynystyq sipattaǵy quqyq buzýshylyq tirkelgen. Bul ótken jylmen salystyrǵanda 8%-ǵa kóp. Bas prokýratýranyń Quqyqtyq statistika jáne arnaiy esepke alý komiteti bul qylmystardyń 99%-y er adamdar tarapynan jasalǵanyn habarlady.
Oqý-aǵartý vitse-ministri Edil Ospannyń aitýynsha, bala asyrap alýǵa úmitkerlerge qoiylatyn talaptardy kúsheitetin birneshe zańnamalyq ózgeris daiyndalǵan. Olardyń qatarynda erli-zaiyptylarǵa basymdyq berý, asyrap alýshy men balanyń jas aiyrmashylyǵyn retteý, úmitkerlerdiń sottylyq týraly derekterin jyl saiyn jańartý, mindetti psihologiialyq tekserýden ótý jáne akkredittelgen uiymdarda oqytý talaptary bar.
"Konstitýtsiialyq Sottyń normativtik qaýlysyn oryndaý aiasynda ministrlik jetim balalar men ata-anasynyń qamqorlyǵynsyz qalǵan balalardy tárbieleýde erli-zaiyptylarǵa basymdyq beretin birneshe zańnamalyq normalardy daiyndady”, — dedi ol.
Bul túzetýler qazirgi ýaqytta memlekettik organdarda qaralyp jatyr. Sodan soń Parlamenttiń qaraýyna jiberiledi. Jańa normalar bala asyrap alý protsesin qaýipsiz ári tiimdi etýge baǵyttalǵan.
