2026 jyldyń birinshi jartyjyldyǵynda Qazaqstanda azyq-túlik óndirisi ótken jyldyń sáikes kezeńimen salystyrǵanda 14,7%-ǵa ósti, dep habarlaidy dalanews.kz.
Aýyl sharýashylyǵy ministrligi málimetinshe, qazirgi ýaqytta el negizgi azyq-túlik túrleri boiynsha ishki qajettilikti qamtamasyz etip otyr. Negizgi azyq-túlik ónimderiniń basym bóligi boiynsha ózin-ózi qamtamasyz etý deńgeii 80%-dan asady.
Sonymen qatar qus eti, balyq, qant, irimshik pen súzbe, shujyq ónimderi jáne alma óndirisin ulǵaitý arqyly importqa táýeldilikti tómendetý jumystary jalǵasyp jatyr.
Ministrlik málimetinshe, sút óndirisin damytý úshin jalpy jyldyq qýattylyǵy 500 myń tonnadan asatyn 95 taýarly-sút fermasy qarjylandyrylǵan. Onyń 71-i paidalanýǵa berilgen. Jyl sońyna deiin taǵy 19 fermany iske qosý josparlanyp otyr.
Sońǵy bes jylda qus eti óndirisi 58%-ǵa ósip, import kólemi 25%-ǵa azaiǵan. Ishki naryqty otandyq qus etimen qamtamasyz etý deńgeii 58%-dan 78%-ǵa deiin jetken. Bul baǵytta Almaty oblysyndaǵy Aitas jáne Jambyl oblysyndaǵy Alel Agro kompaniialarynyń jańa jobalary júzege asyrylmaq.
2025 jyldyń qorytyndysynda azyq-túlik óndirisiniń kólemi 4 trln teńgege jetip, 8,4%-ǵa ósken. Al agroónerkásip kesheniniń negizgi kapitalyna salynǵan investitsiialar 1,6 trln teńgeni qurap, ótken jylmen salystyrǵanda 46%-ǵa artqan. Biylǵy birinshi jartyjyldyqta bul kórsetkish 926 mlrd teńgege jetip, 55%-ǵa ósti.
Ministrlik málimetinshe, kókónis saqtaý infraqurylymyn damytý aiasynda jalpy syiymdylyǵy 745,6 myń tonnany quraityn 95 kókónis qoimasy paidalanýǵa berilgen.
Forvardtyq satyp alý baǵdarlamasy boiynsha biyl 173 aýyl sharýashylyǵy óndirýshisine shamamen 32 mlrd teńge bólinip, 480 myń tonna ónimge kelisimshart jasalǵan.
Kóktemgi egis, egin jinaý jumystary jáne aýyl sharýashylyǵy tehnikasynyń lizingi úshin biyl 1,1 trln teńge kóleminde jeńildetilgen qarjylandyrý qarastyrylǵan. Budan bólek, salany sýbsidiialaýǵa 588,3 mlrd teńge bólingen.
Ministrlik deregine sáikes, 2025 jyly agroónerkásip kesheninde 841 mlrd teńgege 255 investitsiialyq joba iske qosylǵan. Biyl jalpy quny 1,3 trln teńge bolatyn 161 jobany júzege asyrý josparlanyp otyr.
Sondai-aq aýyl sharýashylyǵy ónimderiniń eksporty ósip keledi. 2025 jyldyń qorytyndysy boiynsha agroónerkásip kesheni ónimderiniń eksporty 37%-ǵa artyp, 7 mlrd AQSh dollaryna jetken. Onyń jartysynan astamyn qaita óńdelgen ónim quraǵan.
Ministrliktiń málimetinshe, 2024–2025 marketingtik jylynda Qazaqstan astyq pen undy astyq balamasynda rekordtyq 15,3 mln tonna kóleminde eksporttady. Al 2025 jylǵy qyrkúiekten 2026 jylǵy 30 shildege deiin eksport kólemi 13,9 mln tonnany qurap, ótken jyldyń sáikes kezeńimen salystyrǵanda 12,6%-ǵa artqan.
Vedomstvonyń dereginshe, 2025 jyldyń qorytyndysynda Qazaqstan un men zyǵyr eksporty boiynsha álemde ekinshi, jasymyq boiynsha tórtinshi, kúnbaǵys maiy boiynsha altynshy, bidai boiynsha jetinshi jáne arpa eksporty boiynsha segizinshi orynǵa shyqqan.
