Qazaqstanda azyq-túlik taýarlarynyń baǵasy jyldyq esepte 13,5%-ǵa deıin jedeldedi, dep habarlaıdy Dalanews.kz Ulttyq banktiń baspasóz qyzmetine siltep.
Jyldyq ınflásıa
«Qazanda jyldyq ınflásıa 12,6% boldy (qyrkúıekte – 12,9%). Azyq-túlik ónimderiniń baǵasy 13,5%-ǵa (qyrkúıekte – 12,7%) ósti, al azyq-túlikke jatpaıtyn taýarlar 11%-ǵa (10,8%) deıin qymbattady. Qyzmetterdegi baǵa ósimi retteletin komýnaldyq tarıfterdiń ákimshilik tómendeýine baılanysty 12,9%-ǵa (15,3%-dan) deıin baıaýlady. Jalpy alǵanda, ınflásıanyń joǵary qarqyny usynystan turaqty túrde asyp túsetin suranys aıasynda qalyptasyp otyr», – delingen Ulttyq bank taratqan aqparatta.
Tarıfterdi qaıta qaraý jáne janar-jaǵarmaı naryǵyn yryqtandyrý baǵaǵa jáne ınflásıalyq kútýlerge qosymsha yqpal etip jatyr.
«Keıbir taýar naryqtaryndaǵy teńgerimsizdik, turaqty suranys, ımporttyń qymbattaýy men shyǵyndardyń ósýi azyq-túlik ınflásıasynyń negizgi draıverine aınaldy. Qyzmetter ınflásıasynyń úlesi tómendegenimen, baǵa ósiminiń qarqyny áli de joǵary deńgeıde qalyp otyr. Azyq-túlikke jatpaıtyn ınflásıada janarmaı men farmasevtıkalyq ónimderdiń qymbattaýy aıqyn seziledi», – delingen habarlamada.
Aılyq ınflásıa
Qazanda aılyq ınflásıa 0,5%-ǵa deıin edáýir baıaýlaǵanymen, bazalyq ınflásıa 1% deńgeıinde qalyp, joǵary bolyp otyr. Bul kórsetkish jyldyq esepte 12,2%-ǵa sáıkes keledi. Sonymen birge tutyný sebetiniń 80%-yn quraıtyn taýarlar men qyzmetter 5% nysanaly dálizden joǵary qarqynmen qymbattap jatyr. Bul baǵa qysymynyń turaqtylyǵy men keń kólemde baıqalatynyn kórsetedi. Mundaı úrdiske fıskaldyq jáne kvazıfıskaldyq yntalandyrýdyń kúsheıýi, sondaı-aq tutynýshylyq suranystyń artýy áser etip otyr.
Inflásıalyq boljamdar
«Halyqtyń ınflásıaǵa qatysty kútýleri qazanda 13,6%-ǵa deıin ósti (qyrkúıekte – 13,2%). Qysqa merzimdi kútýler qubylmaly bolyp qalyp, belgisizdik deńgeıin arttyrady. Uzaq merzimdi kútýler 14,3%-ǵa deıin joǵarylady (buǵan deıin – 14%). Mundaı joǵary kútýler dezınflásıanyń baıaýlaýyna jáne baǵanyń shyǵyn men suranys ózgerisine táýeldiliginiń artýyna ákeledi», – dep túsindirdi retteýshi organ.
Syrtqy faktorlar
Syrtqy ınflásıalyq qysym da álsiremeı tur.
«Álemdik azyq-túlik baǵasy joǵary deńgeıde saqtalýda. Reseıde ınflásıa baıaýlaǵanymen, 4% nysanadan aıtarlyqtaı joǵary. Osyǵan baılanysty reseılik retteýshi qatań aqsha-kredıt saıasatyn saqtap otyr. AQSH-ta da FRJ ósim qarqynynyń baıaýlaýyn, eńbek naryǵynyń álsireýin jáne ınflásıanyń joǵary bolyp otyrǵanyn atap ótip, saqtyq ustanymyn jalǵastyrýda.
Eýropalyq ortalyq banktiń de rıtorıkasy ózgergen joq, mólsherleme qaıta kóterilgen joq, al bolashaqta saıasaty jeńildeý qarqynmen jumsarýy múmkin. Jańartylǵan boljamǵa sáıkes, Brent markaly munaıdyń baǵasy aldaǵy kezeńde barreline orta eseppen 60 dollar deńgeıinde saqtalady», – dedi Ulttyq bank.
