Qazaqstan qarjygerler qaýymdastyǵynyń taldaýynsha, elde jumys isteitin azamattardyń jartysyna jýyǵy ǵana zeinetaqy qoryna turaqty jarna aýdarady. Bul bolashaqta kóptegen qazaqstandyqtyń jinaqtalǵan zeinetaqy kóleminiń jetkiliksiz bolýyna ákelýi múmkin, dep habarlaidy dalanews.kz.
Qaýymdastyqtyń Taldaý ortalyǵy jariialaǵan sholýǵa sáikes, jylyna 9–12 ai boiy turaqty zeinetaqy jarnasyn tóleitinder sany 4,7 million adamdy quraidy. Bul – eldegi jumys kúshiniń jartysynan az.
"Búginde turaqty zeinetaqy jarnasyn aýdaratyndar sany nebári 4,7 million adam nemese jumys isteitin halyqtyń jartysynan azy. Bul kóptegen azamat úshin basty másele zeinetaqy jinaǵyn merziminen buryn paidalaný emes, zeinet jasyna jetkende jinaqtyń jetkiliksiz bolýy ekenin kórsetedi", - delingen Qazaqstan qarjygerler qaýymdastyǵynyń málimdemesinde.
Sonymen qatar 2026 jylǵy 1 maýsymdaǵy jaǵdai boiynsha qazaqstandyqtardyń zeinetaqy jinaǵy 27,7 trln teńgege jetken. Jyl basynan beri onyń kólemi 1,4 trln teńgege nemese 5,4%-ǵa ósken. Buǵan jumys oryndarynyń kóbeiýi, jalaqynyń artýy jáne investitsiialyq tabystyń ósýi áser etken.
QQQ dereginshe, investitsiialyq tabys búginde barlyq zeinetaqy jinaǵynyń 40%-dan astamyn quraidy. Al zeinetaqy aktivteriniń 99,6%-y áli de Ulttyq banktiń basqarýynda bolsa, jeke basqarýshy kompaniialardyń úlesi nebári 0,4% deńgeiinde qalyp otyr.
"Zeinetaqy júiesin damytý úshin eń aldymen halyqty turaqty zeinetaqy jarnasymen keńinen qamtý qajet. Sonymen birge resmi jumyspen qamtýdy arttyryp, halyq tabysyn kóbeitý jáne zeinetaqy aktivteriniń tabystylyǵyn qamtamasyz etý mańyzdy. Azamattardyń jinaqtaýshy júiege degen senimi de sheshýshi ról atqarady", - dep atap ótti Qazaqstan qarjygerler qaýymdastyǵy.
