Balalardyń ákesi alıment tólemese, bul alımentti nemerelerine ata-ájesinen óndirip alý usynysy talqylanyp jatyr. Bul týraly QR Ádilet mınıstri Marat Beketaev málim etti, – dep habarlaıdy Dalanews.kz.
«Bul baǵyttaǵy zertteý jumystary kezinde Italıada óte qyzyqty tájirıbeni kórdik. Bul elde alıment boıynsha boryshker, ıaǵnı balalardyń ákesi alıment tólemese, onda Italıa sottary ne isteıdi? Italıa zańy boıynsha bul qaryzdy boryshkerdiń ata-anasynyń jaýapkershiligine jatqyzýǵa bolady.
Iaǵnı, sýdıa: «eger ata-anasy osyndaı jaýapkershiligi tómen jigitti tárbıelese, onda olar balasy úshin alıment tóleýi tıis» degen ýájdi aıtady.
Atap aıtqanda, nemereleri ata-ájesi úshin bóten emestigi nazarǵa alynady», - dedi M. Beketaev Parlament Májilisindegi Úkimet saǵatynda.
Osy oraıda mınıstr qazirgi kezde bul tájirıbeni jalpy qoǵamda talqylaý bastamasy jasalyp otyrǵandyǵyn atap ótti.
«Bul turǵyda qandaı pikir bolatynyn bilgimiz keledi. Keıbireýler atalǵan tájirıbe durys emestigin alǵa tartýda. Iaǵnı, boryshker ózi jaýap berýi tıis, onyń qaryzyn ata-anasy tóleýge mindetti emestigin aıtýda. Degenmen de Italıanyń tájirıbesi qyzyǵýshylyq týdyrýda. Sondyqtan ony talqylaǵan durys bolady. Meniń oıymsha, tıisti zań jobasyna osy normany engizý kerek», - dedi vedomstvo basshysy.
Sonymen qatar, tilshiler M. Beketaevtan boryshkerdiń ata-anasy zeınetker bolsa, olarǵa bul jaýapkershiliktiń júktelýi múmkindigin surady.
«Zeınetker atasy men ájesinde múlikteri bar, ıaǵnı olarda páterleri, kólikteri bar. Bul óz kezeginde qaryzdy jabýdyń kózi bola alady. Eger de mektepke barý úshin nemerelerine kıim alýdyń ózi qıyn bolyp jatsa, ne isteý kerek?!», - dedi mınıstr.
Budan buryn habarlanǵandaı, Májilistegi Úkimet saǵatynda Marat Beketaev kelip túsken shaǵymdardyń jartysyn osy alımentti óndirip alý kategorıasy qamtyp otyrǵanyn aıtty.
