بالالاردىڭ اكەسى اليمەنت تولەمەسە، بۇل اليمەنتتى نەمەرەلەرىنە اتا-اجەسىنەن ءوندىرىپ الۋ ۇسىنىسى تالقىلانىپ جاتىر. بۇل تۋرالى ق ر ادىلەت ءمينيسترى مارات بەكەتايەۆ ءمالىم ەتتى، – دەپ حابارلايدى Dalanews.kz.
«بۇل باعىتتاعى زەرتتەۋ جۇمىستارى كەزىندە يتاليادا وتە قىزىقتى تاجىريبەنى كوردىك. بۇل ەلدە اليمەنت بويىنشا بورىشكەر، ياعني بالالاردىڭ اكەسى اليمەنت تولەمەسە، وندا يتاليا سوتتارى نە ىستەيدى؟ يتاليا زاڭى بويىنشا بۇل قارىزدى بورىشكەردىڭ اتا-اناسىنىڭ جاۋاپكەرشىلىگىنە جاتقىزۋعا بولادى.
ياعني، سۋديا: «ەگەر اتا-اناسى وسىنداي جاۋاپكەرشىلىگى تومەن جىگىتتى تاربيەلەسە، وندا ولار بالاسى ءۇشىن اليمەنت تولەۋى ءتيىس» دەگەن ءۋاجدى ايتادى.
اتاپ ايتقاندا، نەمەرەلەرى اتا-اجەسى ءۇشىن بوتەن ەمەستىگى نازارعا الىنادى»، - دەدى م. بەكەتايەۆ پارلامەنت ماجىلىسىندەگى ۇكىمەت ساعاتىندا.
وسى ورايدا مينيستر قازىرگى كەزدە بۇل تاجىريبەنى جالپى قوعامدا تالقىلاۋ باستاماسى جاسالىپ وتىرعاندىعىن اتاپ ءوتتى.
«بۇل تۇرعىدا قانداي پىكىر بولاتىنىن بىلگىمىز كەلەدى. كەيبىرەۋلەر اتالعان تاجىريبە دۇرىس ەمەستىگىن العا تارتۋدا. ياعني، بورىشكەر ءوزى جاۋاپ بەرۋى ءتيىس، ونىڭ قارىزىن اتا-اناسى تولەۋگە مىندەتتى ەمەستىگىن ايتۋدا. دەگەنمەن دە يتاليانىڭ تاجىريبەسى قىزىعۋشىلىق تۋدىرۋدا. سوندىقتان ونى تالقىلاعان دۇرىس بولادى. مەنىڭ ويىمشا، ءتيىستى زاڭ جوباسىنا وسى نورمانى ەنگىزۋ كەرەك»، - دەدى ۆەدومستۆو باسشىسى.
سونىمەن قاتار، تىلشىلەر م. بەكەتايەۆتان بورىشكەردىڭ اتا-اناسى زەينەتكەر بولسا، ولارعا بۇل جاۋاپكەرشىلىكتىڭ جۇكتەلۋى مۇمكىندىگىن سۇرادى.
«زەينەتكەر اتاسى مەن اجەسىندە مۇلىكتەرى بار، ياعني ولاردا پاتەرلەرى، كولىكتەرى بار. بۇل ءوز كەزەگىندە قارىزدى جابۋدىڭ كوزى بولا الادى. ەگەر دە مەكتەپكە بارۋ ءۇشىن نەمەرەلەرىنە كيىم الۋدىڭ ءوزى قيىن بولىپ جاتسا، نە ىستەۋ كەرەك؟!»، - دەدى مينيستر.
بۇدان بۇرىن حابارلانعانداي، ماجىلىستەگى ۇكىمەت ساعاتىندا مارات بەكەتايەۆ كەلىپ تۇسكەن شاعىمداردىڭ جارتىسىن وسى اليمەنتتى ءوندىرىپ الۋ كاتەگورياسى قامتىپ وتىرعانىن ايتتى.
